Atyraý oblystyq tilderdi damytý jónindegi basqarma jyl saıyn Jumeken oqýlaryn ótkizip keledi. Bul úrdis bıyl da jalǵasty. Qazaqstan Respýblıkasy Gımni avtorlarynyń biri, Memlekettik syılyqtyń laýreaty Jumeken Nájimedenov atyndaǵy respýblıkalyq kórkemsóz oqý sheberleri baıqaýy aqynnyń týǵan jerine talantty jastardy jınady. Elimizdiń túkpir-túkpirinen kelgen jastar Jumekenniń prozalyq, poezııalyq shyǵarmalaryn jatqa oqýdan saıysqa tústi.
Qazylar alqasynyń tóraǵasy, Qazaqstan Jazýshylar odaǵy basqarma tóraǵasynyń orynbasary, Prezıdent syılyǵynyń laýreaty Mereke Qulkenov: «Jumekenniń kez kelgenniń túsinýge óresi jete bermeıtin tuńǵıyq tereń shyǵarmalary – qazaq ádebıetiniń máńgilik murasy. Baıqaýǵa qatysqan 17 jastyń sol tereńdik pen bıiktikke degen qulshynysy kóńil qýantady», dep atap ótti.
– Jumeken oqýlary buryn oblystyq deńgeıde ótetin, bıyl úshinshi jyl qatarynan respýblıkalyq baıqaý uıymdastyrdyq, – deıdi oblystyq tilderdi damytý jónindegi basqarma basshysy Ásııa Qystaýbaeva. – Jyl sanap baıqaýǵa qyzyǵýshylyq tanytatyn jastar qatary kóbeıip keledi.
Baıqaý qorytyndysynda bas júldeni qaraǵandylyq Aısulý Nurtaı jeńip aldy.
Baqytgúl BABASh,
«Egemen Qazaqstan»
ATYRAÝ
