Túlkibas aýdanyna arnaıy issaparmen kelgen Parlament Senatynyń depýtattary Asqar Beısenbaev pen Álı Bektaev aýdan aktıvimen jáne turǵyndarmen kezdesýinde Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynyń basym baǵyttaryna jeke-jeke toqtalyp, mańyzdylyǵyn túsindirdi. Al Saıram aýdany turǵyndarymen bolǵan kezdesýde senator Á.Bektaev «Bıznestiń jol kartasy -2020» baǵdarlamasynyń ne sebepten taǵy da 5 jylǵa uzartylǵanyn túsindirip ótti. О́ziniń ómirsheńdigin dáleldegen baǵdarlamanyń arqasynda elimizde talaı kásipker nesıe alyp, kóptegen kásipkerlik sýbektileri iske qosyldy, myńdaǵan jumys oryndary ashyldy.
Maqtaaralda aýdan aktıvimen kezdesý ótkizgen senator Álimjan Qurtaev Elbasynyń Joldaýyndaǵy negizgi baǵyttarǵa jeke-jeke toqtalyp, úkimetke 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirý tapsyrylǵanyn atap ótti. Joldaýda aıtylǵan turmys sapasyn arttyrý, ómir súrýge jaıly orta qalyptastyrý, azamattar suranysyna beıimdelgen memlekettik apparat qurý, tıimdi syrtqy saıasat, árbir qazaqstandyqtyń elimizdegi ózgerister úderisine atsalysýy máseleleri boıynsha naqty mysaldarmen, jan-jaqty taldaı otyryp túsinikteme berdi.
Kezdesýde sóz alǵan Maqtaaral aýdanynyń Qurmetti azamaty Qasymhan Hametov Joldaýda aıtylǵan basym baǵyttardy oryndaý úshin atqarýshy organdar sergek jumys isteýi kerektigin tilge tıek etti. Aýdandyq máslıhattyń depýtaty, akademık Ibadýlla Úmbetaev aýyl sharýashylyǵy salasynda 2 ese paıda tabý úshin álemniń úzdik tehnologııalaryn jergilikti jerge beıimdep engizý kerektigin jetkizdi. Jergilikti máslıhat depýtaty Berik Shampıev maqtaǵa beriletin sýbsıdııanyń kólemin ulǵaıtý boıynsha usynys jasasa, aýdandyq máslıhattyń hatshysy Qadir Sársekbaev kúzde jáne kóktemde beriletin janar jaǵarmaıdyń merzimin ózgertý boıynsha másele kóterdi. Sondaı-aq ardager Perdesh Esenbekov oblys ortalyǵy Shymkent qalasynan Túrkistan qalasyna aýysqaly Maqtaaral eń shalǵaı aýdan bolǵanyn, jańa aýdanda aýyl sharýashylyǵy ónimderin syrtqa jóneltý úshin temir jol men áýejaı qajettiligin alǵa tartty. Avtojoldardyń sapasyn jaqsartý kerektigi de aıtyldy. О́z pikirlerin ortaǵa salǵandardyń barlyǵy Elbasy Joldaýyn úlken yqylaspen qoldaıtyndyqtaryn jáne óz úlesterin qosatyndaryn bildirdi.
Ǵalymjan ELShIBAI,
«Egemen Qazaqstan»
Túrkistan oblysy
