Elbasynyń «Qazaqstandyqtardyń ál-aýqatynyń ósýi: Tabys pen turmys sapasyn arttyrý» Joldaýynyń negizgi baǵyttaryn túsindirý kezdesýdiń basty maqsaty boldy.
Senator D.Ádilbekov Joldaýdaǵy áleýmettik salaǵa arnalǵan taraýlaryna keńinen toqtalyp, bilim berý men densaýlyq saqtaý salasyndaǵy jańa baǵdarlamalardy birtindep engizý, shaǵyn jáne orta bızneske salynatyn salyq júktemesin azaıtý týraly áńgimeledi. Halyqtyń ál-aýqatyn arttyrýǵa baǵyttalǵan azamattardyń jalaqysyn kóterý jáne osy baǵdardaǵy basqa da máseleler qyzý talqylandy.
Rashıt Ákimov Elbasynyń Joldaýyn júzege asyrý maqsatynda elimizdiń aýyl sharýashylyǵyn damytý máselesine toqtaldy. Bul oraıda, ónim sapasy men ónimdiligin arttyrý, astyq pen ettiń eksporty jáne olardy qaıta óńdeýge baǵyttalǵan sýbsıdııalarǵa basymdyq beriletin bolady. R.Ákimovtiń pikirinshe, ekonomıka men aýyl sharýashylyǵynyń barlyq salalaryna jańa tehnologııalardy engizý arqyly eńbek ónimdiligi artady.
Kolledj dırektory Qanat Súıindikov depýtattarǵa oqý synyptary men óndiristik sheberhanalardy, materıaldyq-tehnıkalyq bazany kórsetip, túlekterdi jumysqa ornalastyrýdyń jaǵdaıy týraly aıtyp berdi.
Kezdesýge Astrahan aýdanynyń ákimi Nurlan Seıilov pen máslıhat hatshysy Mıram Qojahmet qatysty.
