Sóıtip, Pavlodar oblysynyń Maı aýdanynda jóndelgen bul joldardyń jalpy uzyndyǵy 24 shaqyrymdy qurady. Jóndeý jumystarynan keıin jol usaq túıirshikti asfalt-betonnan jasalǵan jetildirilgen jabyny bar, eni 7 metrlik III sanatty jol bolyp shyǵa keldi. О́tken jyldyń mamyr aıynda bastalǵan jóndeý jumystary josparlanǵan merziminen 2 aı buryn aıaqtaldy.
«Biz avtojoldar oblys jáne jergilikti júk jáne jolaýshylar tasymaly úshin úlken mańyzǵa ıe ekenin túsindik. Sondyqtan da barlyq jumysty múmkindiginshe erterek aıaqtaýǵa bar kúshimizdi saldyq», deıdi ABK-Avtodor NS dıvızıony Pavlodar fılıalynyń jetekshisi Azamat Birseıitov.
Qurylysshylar sapa men normatıvterdi qatań baqylaıtyn jeke zerthanany paıdalana otyryp, joldy anaǵurlym sapaly etýge múmkindik bergen tehnologııany qoldandy. Onyń máni tas kómirdiń kúlinde bolyp tabylady. Ol sementpen, topyraqpen jáne qıyrshyq taspen birge joldyń birinshi jáne qosymsha qabattaryna salynǵan.
Aǵa zerthanashy Qurbanbek О́mirzaqov: «Kúldi Ekibastuz MAES-1-den jetkizdik. Osylaısha, onyń óndirisiniń qaldyqtary tehnologııanyń arqasynda ekinshi ret paıdalanylyp, ıgi iske jaratyldy. Biz sementti negizinen jol qysqa ýaqytqa bolsa da berik bolsyn dep qosamyz, al kúl ýaqyt óte kele qataıady, demek, ýaqyt ótken saıyn jol qabattary bekı túsetin bolady. Jergilikti topyraqta sazdaq kóp, al qosymsha beriktilik bizge esh artyqshylyq etpeıdi» deıdi.
Qalǵan ınertti materıaldar Maıqaıyń aýylynan ákelinipti. Ýchaske bastyǵy Nurdáýlet Qasenovtiń aıtýynsha, joba 93 qol jáne 40 birlik tehnıka kúshimen júzege asyrylǵan.
Ýchaskeni qaıta jóndeý – bul tek jol tósemin salý ǵana emes, sonymen qatar sý ótkizý qubyrlaryn, joldyń janasýlary men avtobýs aıaldamalaryn salý sekildi qosalqy jumystardan da turady.
Farıda BYQAI,
«Egemen Qazaqstan»
Pavlodar oblysy
