Úkimet delegasııasynyń quramynda Qytaıǵa barǵan oblys ákiminiń orynbasary Meıirjan Myrzalıev Qostanaı qalasyndaǵy Indýstrııalyq aımaqta teledıdar shyǵaratyn zaýyttyń bıyl bastalatyn qurylysynyń Jol kartasyna qol qoıdy. Jaqynda traktor, aýyl sharýashylyǵy, qurylys tehnıkalaryn shyǵaratyn Qytaıdaǵy, tipti jalpy álemdegi eń iri óndiristiń biri YTO Group Corporation kompanııasynyń delegasııasy Qostanaıǵa kelip ketti. Kompanııanyń dırektorlar keńesiniń tóraǵasy Chjao Ishýı qostanaılyqtarmen yntymaqtastyq ornatýǵa, onyń ishinde traktor óndirisin damytýǵa yntaly ekenin bildirdi. Aıta keteıik, Qytaı jaǵy osy jobaǵa josparlaǵan ınvestısııalyq qarjynyń alǵashqy satysyndaǵy kólemi 25 mıllıon dollardy quraıdy.
Qostanaı oblysynyń ınvestısııalyq áleýetine Qytaı da, Reseı de qyzyǵýshylyq tanytyp otyr. Shyǵystaǵy kórshimizdiń mashına shyǵaratyn Sinotruk, Hanteng automobile Co., Ltd., SANY Group kompanııalary jáne Reseıdiń «Krasnogvardeıskıı mashınostroıtelnyı zavod» AQ, «Sıbeko» AAQ Qostanaı qalasyndaǵy Indýstrııalyq aımaqqa óndirisin ornalastyrýǵa yntaly. Aldymen Indýstrııalyq aımaqqa aýylsharýashylyq tehnıkalaryn óndiretin «Kompozıt Grýpp» transulttyq holdıngi kelip úlgerdi. Onyń ónimi eksportqa TMD elderine artylady.
Aýyl sharýashylyǵy ónimderin jetkize óńdeıtin zamanaýı keshendi qazaqstandyq «BioQrain» jaýapkershiligi shekteýli seriktestigi qytaılyq ınvestorlarmen birigip salatyn bolady. Qytaılyq ınvestısııa arqyly júzege asatyn bul úshinshi jobaǵa quıylatyn qarjynyń kólemi 300 mıllıon AQSh dollaryn quraıdy. Keshenniń qurylysy kelesi jyly bastalady. Qostanaıda júzege asatyn osy úsh joba da «Bir beldeý – bir jol» jáne «Nurly jol» baǵdarlamalary qoldaý kórsetetin Qazaqstan-Qytaı ınvestısııalyq jobalardyń tizimine kiredi.
– Iri úsh joba da óńir ekonomıkasyna serpin beretin bolady. Árıne qurylǵan ár kásiporynnan qostanaılyqtar óziniń jumys ornyn tabady. Olar óndirgen ónimniń barlyǵy da óńirdiń, elimizdiń eksporttyq áleýetin keńeıte túsedi, – deıdi oblys ákiminiń orynbasary M.Myrzalıev.
Osyndaı iri ınvestısııalyq jobalar arqyly Qostanaı óńiri ekonomıkasynyń ártaraptylyǵy da arta túsýde.
Názıra JÁRIMBET,
«Egemen Qazaqstan»
QOSTANAI
