Búgin Almatydaǵy S.Asfendııarov atyndaǵy Qazaq Ulttyq medısınalyq ýnıversıtetinde «Fıtonırıng – fıtomedısınadaǵy jańa dáýir, dástúrden búgingi zamanǵa qaraı» atty ǵylymı-tájirıbelik konferensııa ótti.
Konferensııaǵa Qazaqstan óńirlerinen 200-den asa delegat pen respýblıkadaǵy medısınalyq ýnıversıtetterdiń professorlyq-oqytýshylyq quramy, ǵylymı-zertteý ınstıtýttary men ortalyqtarynyń qyzmetkerleri (gınekologtar, ýrologtar, terapevter, pedıatrlar, nefrologtar), sondaı-aq, Germanııa men Reseıdiń jetekshi ǵalymdary qatysty.
Konferensııada antıbıotıkterge aǵzanyń úırenýi qazir búkilálemdegi qoǵamdyq densaýlyq saqtaý salasynyń kókeıkesti jahandyq máselesine aınalyp kele jatqandyǵy talqylandy.
Kóptegen elder antıbıotıkke tózimdilikti tejeý úshin túrli sharalar qabyldaýǵa májbúr. Bul máselemen Qazaqstan da betpe-bet kelýde.
Jıyn barysynda antıbıotıkke tózimdilikti tejeýdiń basty joly retinde – durys antıbıotık terapııasyn taǵaıyndaýǵa qatysty medısınalyq qaýymdastyq pen halyqqa bilim berý, antıbıotıkterdi sebepsiz qoldanýdy toqtatý jáne balamaly tásilderdi izdeý usynyldy.
Munyń bir sheshimi – ozyq óndiristik tehnologııalardy qoldana otyryp, sapaly ósimdik shıkizatynan jasalǵan ári standarttalǵan, tıimdi de qaýipsiz dárilik preparattar balyp tabylmaq.
Osy oraıda Qazaqstandaǵy «Bıonorıka» kompanııasynyń fıtonırıng tujyrymdasy arqyly bolashaq farmasevtıkada jańa salany qalyptastyrý jaıy sóz boldy. Kompanııa tıimdiligi men qaýipsizdigi kóptegen ǵylymı zertteýlermen dáleldengen joǵary tıimdi ári qaýipsiz dári-dármekterdi jasap shyǵarý maqsatynda tabıǵı belsendi zattardyń (FITO-) zor áleýeti men zamanaýı ınnovasııalyq tehnologııalar (ınjıNIRING) qoldanatyny alǵa tartyldy.
Aınash ESALI,
«Egemen Qazaqstan»
ALMATY
