Mınıstr jańa Joldaýdyń áleýmettik baǵyty men qazaqstandyqtardyń ómir súrý sapasyn arttyrýǵa baǵyttalýynyń mańyzyn atap ótti. Sondaı-aq ol memlekettik qyzmetterdi sıfrlandyrý jáne avtomattandyrý erekshe ról atqaratynyn tilge tıek etti. «Bul másele barlyq azamatqa qatysty. Memlekettik qyzmetter belsendi túrde oryndalýy tıis. Bizdiń aldymyzǵa memlekettik qyzmettiń 90 paıyzyn elektrondy formatqa kóshirý mindeti qoıyldy jáne biz muny mindetti túrde júzege asyramyz», dedi D.Abaev.
Bul máseleler barlyq salaǵa tikeleı qatysty. Mysaly, 2019 jyly elektrondy densaýlyq tólqujatyn engizý jáne qujat aınalymyn sıfrly júıege aýystyrý uzyn-sonar kezek pen qaǵazbastylyqtan qutylýǵa kómektesedi.
Kezdesý barysynda óńirlik BAQ-tyń jaı-kúıi, ózekti máseleleri de nazardan tys qalǵan joq. Aımaqtyq jýrnalıster mınıstrmen birge tolǵandyrǵan máselelerin, qazaqstandyq jýrnalıstıkanyń damý perspektıvalaryn talqylady. Shyǵys Qazaqstan oblysy ákiminiń orynbasary Ásem Núsipovanyń aıtýynsha, kezdesýge 152-ge jýyq aımaqtyq jýrnalıst qatysqan. Onyń 123-i baspasóz basylymdarynda jumys isteıdi. Suraqtardyń basym bóligi merzimdi basylymdarda kezdesetin qıyndyqtarǵa qatysty qoıyldy.
Aqparat jáne kommýnıkasııalar mınıstri ınternet resýrstardyń belsendiligine qaramastan, baspasózdiń ǵumyry uzaq bolatynyn aıtty.
«Zertteýlerge súıensek, ınternet resýrstardan maqalany oqýǵa orta eseppen 40 sekýnd ketedi, al gazette osy maqalany oqý 40 mınýtqa deıin sozylýy múmkin. Bul bizdiń gazetti muqııat oqıtynymyzdy bildiredi. Búgingi tańda oqý mádenıeti tómendep bara jatqandaı, biraq ony qaıta qalyptastyrý úshin barymyzdy salamyz», dedi mınıstr.
Aqmaral AǴZAMQYZY,
«Egemen Qazaqstan»
