SK News korporatıvtik gazetinde jarııalanǵan qutyqtaýda Ahmetjan Esimov:
– Qurmetti áriptester! Barshańyzdy «Samuryq-Qazyna» ál-aýqat qorynyń 10 jyldyq mereıtoıymen quttyqtaımyn! On jyldyń ishinde «Samuryq-Qazyna» qoryna qarasty ulttyq kompanııalar el ekonomıkasynyń tiregine aınaldy – búginde ulttyq ekonomıkanyń tórtten úsh bóligin Qor kompanııalary qurap otyr.
Bıylǵy jyldyń sáýir aıynda Prezıdent Nursultan Nazarbaev «Samuryq-Qazyna» qorynyń 2018-2028 jyldarǵa arnalǵan Damý strategııasy men jańartylǵan Transformasııa baǵdarlamasyn bekitip, Qordy damytýǵa baǵyttalǵan is-sharalarǵa oń baǵasyn berdi. Degenmen, keleshek urpaq úshin uzaqmerzimdi damýdy qamtamasyz etetin, ulttyń ál-aýqatyn kóteretin Qorǵa aınalý úshin áli de jumyla eńbek etýimiz qajet,– dedi.
Onyń aıtýynsha, qorǵa qarasty kompanııalardyń qarjylyq turaqtylyǵyn qamtamasyz etip, óndiristi sıfrlandyryp, bıznes-prosessterdi ońtaılandyrý arqyly kompanııalardyń tıimdiligin arttyrý – aksıonerlik qoǵamnyń negizgi maqsaty. Sonymen qatar, qor Jekeshelendirý baǵdarlamasy arqyly strategııalyq ınvestorlardy tartyp, portfel qurylymyn ońtaılandyryp, ınvestısııalyq jobalardy qaıta qaraýǵa múddeli. Kiristi ártaraptandyrý úshin «Samuryq-Qazyna» qazaqstandyq jáne sheteldik seriktestermen birige otyryp tıimdi jobalardy qarjylandyryp, elimizdegi jeke kapıtaldy damytýǵa jaǵdaı jasaýy tıis. Turaqty damý jolyna túsý maqsatynda Qordyń quramyndaǵy árbir kompanııa korporatıvtik basqarýdyń eń joǵarǵy standarttaryn engizýi shart.
– Bıyl «Samuryq-Qazyna» qory jańa kadrlyq saıasatty bekitti. Onyń negizgi maqsaty - Qordaǵy sheshim qabyldaý jyldamdyǵyn arttyryp, holdıngti ońtaıly uıymǵa aınaldyrý. Jańa kadrlyq saıasatqa sáıkes, Korporatıvtik ortalyqta jańa basqarý qurylymy engizildi. Endigi qadam – Qorǵa qarasty barlyq kompanııalarda qyzmetkerlerdi qabyldaýdyń biryńǵaı júıesin engizý, osylaısha ádiletti de ashyq túrde bilikti mamandardy jınaý,– dedi Ahmetjan Esimov.
Quttyqtaýda aıtylǵandaı, Elbasy aldymyzǵa qoıǵan maqsat-mindetterdi oryndap, qazaqstandyqtardyń úmitin aqtaý – qorda qyzmet atqaratyn arbir azamat úshin úlken syn. Sol sebepti basqarma tóraǵasy qor kompanııalarynda jumys atqaratyn 320 myńnan astam azamattyń árqaısysyn qyzmetke adal bolýǵa, júktelgen mindetti sapaly atqarýǵa shaqyrdy.
– Aqparattyq tehnologııalardyń qarqyndy damýy ómirdiń árbir salasyn kóz ilestirmeı ózgertip jatyr. Mundaı ýaqytta ózgege de, ózine de talap qoıa alatyn, bilimge qushtar, básekelestikke qabiletti mamandar ǵana jetistikke jetedi. Mereıtoı qarsańynda barshańyzdyń eńbegińizge bereke, otbasylaryńyzǵa baqyt, qyzmetterińizge tabys tileımin! Mereke qutty bolsyn!– delingen quttyqtaýda.
Aldabergen KEMPIRBAI
