Joba Qazaqstan Prezıdenti N. Nazarbaevtyń «Bolashaqqa baǵdar: rýhanı jańǵyrý» atty maqalasynan týyndap otyr. Joǵary oqý ornynyń brıgadasy óziniń úsh kúndik tanymdyq sapary barysynda okrýgtiń Aqtuma, Cherkassk jáne Qarǵaly aýyldaryndaǵy orta mektepterde bolyp, oqý oryndary arasynda baılanys ornatý jóninde kelisim jasasty.
Biz osyǵan oraı delegasııa basshysy, Qazaq memlekettik qyzdar pedagogıkalyq ýnıversıteti Tárbıe jáne áleýmettik jumystar jónindegi departamentiniń dırektory Jańagúl Sultanovamen kezdesip, sapar barysy jaıynda keńirek málimet berýin suraǵan edik.
– Sapardy Aqtuma aýylyndaǵy Petropavl orta mektebinen bastadyq. Munda mektep dırektory Baýyrjan Ibraıymovamen eki oqý orny arasyndaǵy baılanys jóninde kelisim jasasqannan keıin ýnıversıtettiń «Umaı Ana» úıirmesiniń fılıalyn ashý rásimin ótkizdik. Mundaǵy basty maqsat – qazirgi qoǵamdyq ortada azamattyq ustanymdary bar, alǵan bilimin tájirıbe júzinde ushtastyra biletin, parasatty, salt-dástúr men mádenıetti dáripteıtin, búgingi ómirge beıim, shynaıy jan-jaqty damyǵan qyzdardy qalyptastyrý, aýyl mektepterindegi ádebı shyǵarmashylyqpen aınalysatyn jas talap qyzdardyń týyndylarymen tanysyp, olarǵa qolma-qol baǵyt berý. Bizdiń tarapymyzdan bolǵan bul usynysty mektep basshylyǵy óte jaqsy qabyldady. Sol jerde úıirmemizdiń jańa músheleriniń de birqatarymen tanysyp úlgerdik. Budan keıin aýyl turǵyndary men mektep ujymy aldynda qonaqkádelik dáristerimizdi oqydyq. Olarda ónertaný ǵylymynyń múmkindikteri men salalary, mektep oqýshylarynyń ata-ana men muǵalim, qorshaǵan ortaǵa degen qarym-qatynasyn jaqsartýdyń joldary men tásilderi, oqýshylardyń ósý prosesinde, olardyń jas jáne jeke pedagogıkalyq-psıhologııalyq erekshelikterine qaraı qaqtyǵystyń sebepteri men saldarlaryn anyqtaý jáne olardy sheshýdiń joldary týraly keńinen sóz boldy. Sońynan ýnıversıtetimizdiń «Tomırıs» bı ansambli konsert qoıdy.
Kelesi kúni okrýgtiń Cherkassk aýylyna aıaldadyq. Munda biz birqatar tarıhı jerlermen tanystyq. Azamat soǵysy kezinde Cherkassk qorǵanysynyń orny bolǵan tarıhı meken bolǵan bul aýylda kóretin nárseler az emes eken. Sonyń biri osyndaǵy tarıhı-ólketaný mýzeıi boldy. Bul jerde de mektep basshylyǵymen ózara baılanys jónindegi kelisimge otyrdyq. Munda da «Umaı Ana» úıirmesiniń jergilikti bólimshesi qaz turyp, qanat qaqty. Bizdiń oqyǵan leksııalarymyz bul aýyldyń turǵyndary men mektep ujymynyń kóńilinen shyqty. Muny jınalǵandar tarapynan túrli suraqtardyń qoıylyp, taqyrypqa qyzyǵýshylyq tanytýy anyq baıqatty. Biz mundaı jyly shyraıly qaýyshýdy úshinshi kúni Qarǵaly aýylyndaǵy orta mektepten de kórdik. Barlyq jerlerde bizdiń bastamalarymyz barynsha jyly qabyldandy. Al ýnıversıtettiń kitaphana bóliminiń meńgerýshisi Maırash Ákimjanova jınalǵandardy rýhanı jańǵyrý taqyrybynda jaryq kórgen 17 kitaptyń mazmunymen tanystyrdy. Bir sózben aıtqanda, brıgada óziniń aldyna qoıylǵan maqsat pen mindetti tolyq oryndap qaıtty. Endi jańa bastalǵan baılanys budan ári óristeı túsetin bolady. «Týǵan jerge taǵzym» jobasy jumysyn jalǵastyra beredi.
