Qazaq tili men ózge tilderdi oqytýda ınnovasııalyq ádister men tehnologııalardy zerdeleý, tájirıbege engizý sııaqty kókeıkesti máseleler semınardyń ózegine aınaldy.
Semınarǵa QR Mádenıet jáne sport mınıstrligi Til saıasaty komıteti Til saıasaty basqarmasynyń sarapshysy Gaýhar Madanova, «Memlekettik tildi úıretý elıtalyq kýrsy» mádenı mekemesiniń dırektory Sáýle Baqtybaeva, fılologııa ǵylymdarynyń doktory, professor Baqytjan Hasanov, «Qoǵamdyq kelisim» RMM Almaty qalasy Dostyq úıiniń jumysyn qamtamasyz etý qyzmetiniń jetekshisi Janna Shaımuhanbetova, Kúrdter qaýymdastyǵynyń tóraǵasy Knıaz Mırzoev, professor Aıgúl Satbekova, t.b. ádisker ǵalymdar, til mamandary, etnomádenı birlestikter janyndaǵy jeksenbilik mektepterdiń muǵalimderi qatysty.
«Memlekettik tildi úıretý elıtalyq kýrsy» mádenı mekemesiniń dırektory Sáýle Baqtybaeva jeksenbilik mektepterde qazaq tili men ulttyq tilderdi jedeldete oqytýdaǵy kókeıtesti máselelerdi atap ótti. Osy oraıda atalǵan mekeme tarapynan kez kelgen máseleni saraptap, jan-jaqty zerttep, aıqyndaýǵa baılanysty keshendi sharalar júzege asýda.
Jeksenbilik mektepter mádenı-aǵartýshylyq joba retinde mektep jasyna deıingi balalardy, oqýshylar men eresekterdi tilge baýlýmen qatar, týǵan eldiń tarıhy, mádenıeti turǵysyndaǵy aqparattarmen qamtamasyz etýdi maqsat etedi.
Aǵymdaǵy jyly respýblıkalyq jáne aımaqtyq ulttyq-etnomádenı birlestikter janyndaǵy jeksenbilik mektepterde qazaq jáne ana tilderin oqytý kýrstarynda 144 top quryldy. Onda búginde 26 ulttyń ókilderi bilim alýda. Olardyń 70 paıyzyn mektep oqýshylary men jastar quraıdy. Al jeksenbilik mektepterde qazaq tili men ózge tilderdi jedeldete oqytýdyń ózekti máselelerin sheshý ýaqyt talaby. Bul ınstıtýsıonaldy oqý orny emes, qosymsha ári tegin bilim beretin mektepter. Jeksenbilik mektepter bir júıege keltirilgen baǵdarlamany, jan-jaqty qamtıtyn tujyrymdamany qajet etedi. Osy oraıda mamandarǵa da kásibı qoldaý qajet, ıaǵnı til úıretýdiń ádis-tásilderiniń, etnopedagogıkanyń jáne eltaný negizderimen qatar kásibı psıhologııalyq kómektiń mańyzy zor. Jeksenbilik mektepter tyńdaýshylarynyń jasy da, bilimi de ár túrli keletindikten, olarmen til tabysý, til úırenýge degen qyzyǵýshylyǵyn arttyrýda úlken sheberlik qajet. Osy oraıda mamandar máselesine, oqytý baǵdarlamasyna, arnaıy oqý quraldaryn ázirleýge erekshe nazar aýdarǵan jón.
Semınarda ádisker-ǵalymdar memlekettik jáne ózge de ult ókilderiniń tilderin oqytýdyń tıimdi tehnologııalary men ádis-tásilderimen bólisip, etnomádenı birlestikter janyndaǵy jeksenbilik mektepterdiń úzdik muǵalimderi sheberlik sabaqtaryn kórsetti.
Elvıra Serikqyzy,
«Egemen Qazaqstan»
ALMATY
