Mýzeı qoryndaǵy qundy jádigerler negizinde shyǵarylǵan albom - katalogtar «Túrkistan jazırasynyń qysh ydystary» men «Zergerlik buıymdar toptamasy», «Áziret Sultan» qoryq - mýzeıiniń 40 jyldyq damý tarıhyndaǵy muraǵattar qamtylǵan «40 jyldyq albom», sondaı-aq ár kezeńde hatqa túsken, el aýzynda aıtylyp júrgen ańyz - áfsanalardan jınaqtalǵan «100 ańyz» jáne «Jetpis hıkmet» kitabynyń latyn álipbıindegi nusqasy tarıhı mura bolyp qalandy.
Tarıhy men qasıeti tereń Túrkistan men Qoja Ahmet Iаssaýı babamyzdyń muralaryn urpaq balasyna máńgilikke saqtap, nasıhattaýǵa arnalǵan «Áziret Sultan» qoryq - mýzeıindegi jádigerler sany qazirgi tańda 25000-ǵa jýyqtady. Qundy dúnıelerdi jınaqtap, saqtaýǵa keshegi jáne búgingi árbir mýzeı qyzmetkerleri men mádenıet janashyrlarynyń, arheolog, tarıhshylardyń úlesi zor. О́mirden ótken mýzeı maıtalmandary men janashyr tulǵalarynyń árýaǵyna árqashan bas ıip, taǵzym etemiz», dedi «Áziret Sultan» memlekettik tarıhı-mádenı qoryq - mýzeıiniń dırektory Ahmetjanov Nurbolat Qadyruly.
Qazaqstan Respýblıkasynyń elordasy – Astana qalasynyń 20 jyldyǵyna jáne «Áziret Sultan» memlekettik tarıhı-mádenı qoryq - mýzeıiniń 40 jyldyǵy aıasynda «ULY JIBEK JOLY BOIYNDAǴY ORTAǴASYRLYQ QALALAR» halyqaralyq ǵylymı-praktıkalyq konferensııasy ótip, О́zbekstan, Túrkııa, Ázirbaıjan, Ýkraına elderimen qatar Qazaqstannyń túkpir-túkpirinen kelgen otandyq ǵalymdar men mýzeı isiniń mamandary qatysty.
Konferensııada Túrkistan jazırasynda ortaǵasyrlyq qonystar, qalalar men astanalar, Uly Jibek joly jáne ortaǵasyrlyq qalalardaǵy ǵylym men mádenıet, sheteldik zertteýshiler men saıahatshylar eńbekterindegi ortaǵasyrlyq qalalar, Rýhanı jańǵyrý: mýzeı isi jáne eskertkishterdi qorǵaý máseleleri men tarıhı-mádenı týrızm jáne ony damytý joldary men baǵyttary jóninde qazaq, túrik, orys jáne aǵylshyn tilderinde keńester almasyp, taldandy.
Konferensııa aıasynda Mádenıet jáne sport mınıstri Arystanbek Muhamedıuly men Túrkistan oblysynyń ákimi J. Qanseıitulynyń arnaıy quttyqtaýlary oqylyp, alǵys hattary tabystaldy. Sonymen qatar, mýzeı salasyn damytýǵa eńbek sińirgen basshylar men qyzmetkerler «Áziret Sultan» qoryq - mýzeıiniń 40 jyldyǵy medalimen marapattaldy.
