Qazaqstan Prezıdentiniń ózge elderge sapary barysynda sheteldik bıznes ókilderimen kezdesý uıymdastyrýy dástúrge aınalǵan. Osynyń arqasynda elimizge ınvestorlardyń qyzyǵýshylyǵy, álem elderimen saýda-ekonomıkalyq strategııalyq seriktestigimizdiń aýqymy jyldan-jylǵa keńeıip keledi. Memleket basshysy aıtyp ótkendeı, sońǵy jyldary Eýropa elderimen taýar aınalymy turaqty túrde ósip kele jatyr. Qazaqstanda Eýropa kapıtalynyń qatysýymen túrli salalarda 3 myńǵa jýyq kásiporyn jumys isteıdi.
Elbasynyń osy jolǵy sapary barysynda da eýropalyq bıznes ókilderimen kezdesýi Qazaqstanda qolaıly ınvestısııalyq klımat qalyptasqanyn jáne ekijaqty áriptestik tıimdi sharttar negizinde júzege asyrylatynyn joǵary dárejede taǵy bir naqtylady.
Búginde eýropalyq ınvestorlardyń Qazaqstanǵa qyzyǵýshylyǵy joǵary. Ol tek qana shıkizat salasyna qatysty emes, elimizdiń geografııalyq turǵydan ornalasýy da – tartymdylyqty eseleı túsetin faktor. Memleket basshysy osy máselege erekshe kóńil bólip, Qazaqstan Eýropa men Azııa arasyn baılanystyratyn kópir bolýǵa daıyn ekendigin basa aıtty. Eger sońǵy ýaqytta Eýropa jáne Azııa elderi arasyndaǵy baılanys qarqyndy damyp kele jatqanyn eskersek, mundaı usynys Qazaqstanǵa tıimdi nátıje alyp keleri sózsiz.
Aıta keterligi, Brıýsselde ótken «Azııa-Eýropa» forýmynyń 12-shi sammıtiniń negizgi taqyryby da Azııa men Eýropa arasyndaǵy baılanysty kúsheıtýge arnaldy. Sol sebepti bul másele tóńiregindegi pikir almasý sammıt sheńberinde de jalǵasyn tapty. Tutastaı alǵanda, Elbasynyń Eýropanyń isker toptar ókilderimen kezdesýi elimizdiń saýda-ekonomıkalyq baılanystaryna serpin beretin mańyzdy shara boldy.
Jánibek ARYNOV,
Álemdik ekonomıka jáne saıasat ınstıtýtynyń sarapshysy
