Aqtóbe oblysy Memlekettik qyzmet isteri jáne sybaılas jemqorlyqqa qarsy is-qımyl departamenti, jastar saıasaty basqarmasynyń jáne «Qazaqstan KVN odaǵy» oblystyq fılıalynyń uıymdastyrýymen Astana qalasynyń 20 jyldyǵyna jáne Memlekettik qyzmet organdarynyń 20 jyldyǵyna arnalǵan saıysta 7 komanda baq synasty.
«Korrýpsııasyz bolashaqqa» dep urandatqan S. Baıshev atyndaǵy qurama, «Osal emes», «Fenomen», «35 oıshyldary», «Sóz joq», «Dejavıý», «Jubanov quramasy» atty komandalar el damýyna kesirin tıgizetin indettiń qoǵamda alatyn ornyn, onymen qalaı kúresý qajettiligin kórermenderge ázil arqyly jetkizýge tyrysty.
Aqtóbe oblystyq memlekettik qyzmet isteri jáne sybaılas jemqorlyqqa qarsy is-qımyl departamenti basshysynyń orynbasary Rafhat Bısenovtyń aıtýynsha, bul shara Elbasy joldaýynda atalyp ótken sybaılas jemqorlyqtan ada óńirge aınalý jolynda iske qosylǵan «Aqtóbe – adaldyq alańy» jobasy aıasynda ótkizilýde.
«Biz óskeleń urpaqtyń sybaılas jemqorlyqqa qarsy saıasatty qalyptastyrýda erekshe rólin eskere otyryp, búgingi sharany uıymdastyrýdy usyndyq. Sol arqyly qoǵamda, elimizde, álemde beleń alyp otyrǵan ózekti máseleni kóterip, ashy ázil arqyly ár azamatqa jetkizgimiz keledi»,- dedi R.Bısenov.
Oıyn nátıjesinde joǵary lıga jartylaı fınaldyq oıyndarynyń jeńimpazy bolyp «Sóz joq» komandasy tanylyp, Aqtóbe oblysy joǵarǵy lıga chempıony ataǵyna ıe boldy.
Temir QUSAIYN,
«Egemen Qazaqstan»
