Qujat zııatkerlik menshik quqyqtary nysandaryn qoldaný kezinde zańdy saqtaýdy kózdeıdi. Bul salada zańbuzýshylyqtar, negizinen, ónimderdiń zattańbalaryn dáleldeme qujattarynsyz basyp shyǵarý bolyp tabylady. Qatysýshy taraptar atalǵan zańbuzýshylyqtardy boldyrmaýdyń mańyzdylyǵyn moıyndaı otyryp, menshik salasyndaǵy quqyq buzýshylyq saldaryna aldyn-alý sharalary arqyly tótep berýdi júzege asyrý maqsatynda memorandým jasasty.
«Saýda nemese oıyn-saýyq nysandarynyń mańdaıshylaryna belgili fırmalardyń zatbelgilerin kóshirip basý derekteri jıi kezdesedi. Búgingi memorandým osyndaı zańsyzdyqtardyń aldyn-alý jáne zattańbalardy menshik ıesiniń ruqsatynsyz kóshirip basýdyń jaýapkershiligi týraly taǵy bir ret eskertý maqsatynda jasalyp otyr»,-deıdi Aqtóbe oblysy Ádilet departamentiniń Zııatkerlik menshik quqyqtary bóliminiń basshysy Tımýr Ýbıshev.
Memorandým talaptary boıynsha Kásipkerler palatasy, Ádilet departamenti, Aqtóbe oblysynyń kásipkerlik basqarmasy turǵyndarǵa arnalǵan túsindirý jumystaryn júrgizip, memleket kepildik bergen tegin zań kómegine jáne quqyqtyq saýattylyǵyn arttyrýǵa kómek beredi. Aqtóbe oblysynyń Ishki ister departamenti osyndaı quqyqbuzýshylyqtar anyqtalǵan jaǵdaıda tıisti sharalar qoldanady. Baspahana basshylary taýar tańbalaryn dáleldeme qujattarynsyz basyp shyǵarmaýǵa mindetteledi.
«Zańdy saqtaý-elimizdegi árbir azamattyń mindeti. Bul turǵyda áreketsizdik tanytý da zańsyzdyqqa jaǵdaı týǵyzý bolyp sanalady. Sondyqtan qalamyzdaǵy árbir azamatty zań talaptaryn oryndaýda nemquraılyq tanytpaýǵa shaqyramyn. Búgingi memorandým qoǵamdaǵy qatynastardy durys sheshýge, sonymen qatar qandaı da bolmasyn qatynastardyń buzylýynyń aldyn alý men retteýge óz úlesin qosady dep oılaımyn»,-dedi Aqtóbe oblysynyń «Atameken» kásipkerler palatasynyń dırektory Nurlybek Muqanov.
Memorandým Aqtóbe oblysynyń ákimi men oblystyq prokýratýra bekitken «Krımınogendik jaǵdaıǵa qoǵamnyń áserin arttyrý jolymen quqyqbuzýshylyqtardyń aldyn-alý» sharalar jospary aıasynda júzege asyryldy.
Temir QUSAIYN,
«Egemen Qazaqstan»
