«Qazaqstan týrıstik qaýymdastyǵy» ZTB prezıdenti Roza Asanbaeva búginde elimizdiń týrızmdi damytýǵa áleýetiniń zor ekendigin atap ótti. Onyń dálelin ótken jyly EKSPO-2017 kórmesi aıasynda elimizge kelgen týrıster kórsetkishinen-aq ańǵarýǵa bolady. Alaıda, bul kórsetkish bıylǵy jyly áldeqaıda tómendep ketken.
«Qazaqstan Týrızm qaýymdastyǵy» ZTB dırektory Rashıda Sháıkenova qaýymdastyq týrızmdi damytýǵa arnalǵan sońǵy bastamalardy qýanyshpen qabyldap otyrǵandyǵyn jetkizdi. Prezıdent tapsyrmasy boıynsha ishki jáne kóshpeli týrızmdi damytýǵa arnalǵan memlekettik baǵdarlama jáne jańa zań jobasy daıyndalý ústinde. Alakól, Býrabaı, Kaspıı jáne Túrkistan syndy basty týrızm oryndaryn damytý josparlanǵan.
Sońǵy on jyldyqta álemdik týrızm zor qarqynmen damyp keledi. Sala jahandyq ekonomıkalyq daǵdarysqa qaramastan, ekonomıkanyń eń jyldam damyp jatqan sektorlarynyń birine aınalyp otyr. Alaıda elimizdiń týrızm salasy memlekettik qoldaýdy qajet etedi. Búginde elimizdegi 30-dan astam sala týrızmmen tikeleı baılanysty. Elimizde búginde ishki týrızmniń úlesi joǵary. Sondyqtan da memleket tarapynan týrıstik salada ınfraqurylymdy nyǵaıtýǵa, kásipkerlerge salyq jeńildikterin berýde, jolaýshy tasymalyndaǵy jeńildikter sııaqty t.b. salaǵa serpin beretin múmkindikterge memlekettiń tikeleı qoldaýy qajet.
Aqmola oblysy Týrıstik qaýymdastyǵynyń tóraǵasy Qaırat Sultanov balalar týrızmine basa nazar aýdarý qajettiligin alǵa tartty. Elimizde kezinde 500-den asa balalar demalys oryndary bolsa, búginde onyń shamamen 200-i qalǵan. Mysaly, Kókshetaýda 64 lager bolsa, qazirgi kezde 34-i qalǵan. Al onyń jumys istep turǵany - 18, 13 lager memlekettik bolyp esepteledi. Búginde balalar densaýlyǵyna, olardyń jazǵy demalysyna qatysty ózekti máseleler jetkilikti. Deni saý urpaq – ult kelesheginiń kepili ekendigin nazarǵa alatyn bolsaq, elimizdegi barlyq balalar lagerlerin qaıta jandandyrýymyz qajet. Al «Shyǵys Qazaqstan týrıstik qaýymdastyǵy» ZTB atqarýshy dırektory Serik Júnisov memlekettiń qatysýynsyz týrızm salasy alǵa jyljymaıdy, dep atap ótti. Sondyqtan da jeke sektor men memlekettik organdar arasynda ózara yqpaldastyq kerek.
Elvıra Serikqyzy,
«Egemen Qazaqstan»
ALMATY
