Is-sharaǵa Ulttyq ekonomıka mınıstri Tımýr Súleımenov, «Esquire Kazakhstan» basylymynyń shef-redaktory Gúlnár Bajkenova, «Strategııa» áleýmettik jáne saıası zertteýler ortalyǵy» qoǵamdyq qorynyń ókili Gúlmıra Eleýova, Májilis depýtaty Amanjan Jamalov, «Atameken» ulttyq kásipkerler palatasy jappaı kásipkerlik jáne shaǵyn nesıeleý departamentiniń dırektory Baýyrjan Orazǵalıev qatysty. Dástúr boıynsha basqosýdyń moderatory mindetin «Talap» qoldanbaly zertteý ortalyǵynyń dırektory Rahym Oshaqbaev atqardy.
Pikirtalas otyrysyn ashqan «Nur Otan» partııasy Tóraǵasynyń birinshi orynbasary Máýlen Áshimbaev Elbasynyń Joldaýyn júzege asyrý elimizdiń kún tártibinde turǵan basty mindet ekenin aıtyp, bul qujat ár qazaqstandyqtyń áleýmettik jaǵdaıyn jaqsartýǵa baǵyttalǵanyna nazar aýdardy. Sondaı-aq ol «Nur Otan» partııasynyń Joldaý basymdyqtarynyń júzege asyrylýyna qoǵamdyq baqylaý júrgizetinin tilge tıek etip, osy baǵyttaǵy tıimdi tetikterge toqtalyp ótti.
– Elbasy Joldaýynda qoǵamda qyzý talqylanyp, buqaralyq aqparat quraldary men áleýmettik jelilerde jıi kóterilip júrgen ózekti máselelerdiń naqty sheshimderi kórsetilgen. Sonyń ishinde baspana máselesi, shaǵyn jáne orta bıznes, turǵyn úı-kommýnaldyq sharýashylyǵyndaǵy tarıfterdi shekteý, azamattardyń qaýipsizdigi sııaqty kóptegen másele qamtylǵan. Bul máseleler úshin birinshi kezekte Úkimet, memlekettik organdar jáne ákimder jaýapty bolǵanymen, azamattyq qoǵam, úkimettik emes uıymdar jáne saıası partııalar da olardyń oń sheshilýine múddeli. Sondyqtan Elbasy aıqyndap bergen maqsat-mindetterge qol jetkizý úshin búkil qoǵam bolyp jumylýdyń bereri mol. Osy rette elimizdegi jetekshi saıası kúsh retinde partııamyz Joldaý basymdyqtaryn júzege asyrýdyń tıimdi tetikterin ázirleý jumystaryna belsendi qatysýǵa jáne ári qaraı qoǵamdyq baqylaýdy qamtamasyz etýge daıyn, – dedi M.Áshimbaev.
Memleket basshysynyń Joldaýyn júzege asyrý úshin Jalpyulttyq is-sharalar jospary bekitilgeni belgili. Sonyń aıasynda shamamen 100 is-shara ótkizilmek. Olar: halyq tabysynyń ósýi, turmys sapasyn arttyrý, ómir súrýge jaıly orta qalyptastyrý, azamattar suranysyna beıimdelgen memlekettik apparat, tıimdi syrtqy saıasat jáne árbir qazaqstandyqtyń elimizdegi ózgerister úderisterine atsalysýy sııaqty 6 baǵyt boıynsha iske asyrylmaq.Elbasy bastamalarynyń qarjylyq kólemi 1,5 trıllıon teńgeden asady. Al jıyntyq áseri odan da kóbirek.
Osyǵan oraı Prezıdent Ákimshiliginde Elbasy tapsyrmalarynyń oryndalýyn qatań baqylap, tekserip, júıeli júzege asyrylýyn talap etetin jáne sol boıynsha Memleket basshysyna esep beretin Ulttyq jańǵyrý komıtetin qurý josparlanyp otyrǵany da belgili. Otyrysta budan basqa da kóptegen utymdy usynys pen túrli pikir aıtyldy. Onyń toqeterin Elbasy Joldaýynyń júzege asyrylýyna, oǵan baqylaý júrgizý isine qoǵamdy, sarapshylardy, úkimettik emes uıymdardy, saıası partııalardy, basqa da múddeli qurylymdardy tartýdyń mańyzy zor degen biraýyz sózben túıindeýge bolady. «Nur Otan» partııasy dál osy baǵytta belsendi jumys istemek.
Qatysýshylar kóterilgen máseleler boıynsha óz oı-pikirlerin ortaǵa saldy. Is-shara dástúrge saı onlaın-rejımde ótip, Facebook jelisinde tikeleı efırde kórsetildi. Osy rette pikirtalas qorytyndysy boıynsha naqty usynystar pysyqtalyp, olar Úkimet, Parlament jáne jergilikti atqarýshy organdarǵa joldanatynyn atap ótken jón.
Jaqsybaı SAMRAT,
«Egemen Qazaqstan»
