Birqatar kompanııalardyń basshylary qyzmetkerleriniń jalaqysynyń eń tómengi mólsherin kóterý týraly sheshim qabyldaǵandaryn jetkizdi.Olardyń ishinde «Almaty boıaýlary» JShS, «Abdı Ibragım Global Farm» JShS, «Jarkent krahmal-sirne zaýyty» JShS bar.
«Almaty boıaýlary» JShS dırektorlar keńesiniń tóraǵasy Rımma Salyqova kompanııanyń bıylǵy qarasha aıynan bastap jumyskerleriniń jalaqysyn kóterýge nıetti ekenin jetkizdi. Bul kásiporny 2009 jyldan beri jumys istep keledi, jol belgileri úshin lak-boıaý zattary men jol jóndeý úshin materıaldar shyǵarady.
«Kompanııanyń qalyptasýynda memlekettik qoldaýdyń róli zor boldy. Biz "Bıznestiń jol kartasy" baǵdarlamasynyń alǵashqy qatysýshylarynyń biri boldyq, zaýytty jańǵyrtýǵa nesıe aldyq, sonyń esebinen jańa jabdyqtar satyp alyp, jumys oryndaryn qurdyq. Qazir bizde 160 jumysker jumys isteıdi», — dedi R. Salyqova.
Sonymen qatar ol kompanııa basshylyǵy jumyskerlerdiń áleýmettik jaǵdaıyn kóterýge jáne adam kapıtalyn damytýǵa qarajat salýǵa erekshe kóńil bóletinin aıtty.
«Biz únemi óz jumyskerlerimizdiń jalaqysyn kóterip otyrýǵa tyrysamyz. Búgingi tańda biz barlyq jumyskerlerimizdiń jalaqysyn 50%-ǵa kóterdik. Eńbekaqyny taǵy kóterý kerek dep sheshtik, óıtkeni halyqtyń ál-aýqatyn shynymen de arttyrý kerek. Biz jalaqyny taǵy 15%-ǵa kóterýdi sheshtik. Barlyq kásipodaqtar men belsendi qaýymdastyqtar aýdandarǵa baryp, ákimdermen, kásipkerlermen kezdesip, bul máseleni talqylaýy kerek dep oılaımyn. Ári, memlekettiń kómegi bar, mysaly, bıznesti qoldaý retinde salyq amnıstııasy. Jumyskerlerdiń áleýmettik jaǵdaıyn kóterý qajet. Bul mindet barlyq kásiporyndardyń basshylarynyń aldynda turýy tıis dep oılaımyn», — dedi Rımma Salyqova.
Bul oraıda ol kásiporyndaǵy eń tómengi jalaqy búgingi tańda 76 myń teńgeni qurap otyrǵanyn aıtty. Qarasha aıynda eńbekaqy taǵy 15%-ǵa artady. Buǵan qajetti qarajat kompanııa bıýdjetinde qarastyrylyp qoıylǵan.
О́z kezeginde «Abdı Ibragım Global Farm» JShS bas dırektory Zııathan Gasanov ta Prezıdenttiń eń tómengi eńbekaqyny arttyrý týraly sheshimine qoldaý bildiretinin jetkizdi.
«Joldaýda qosymsha qarajat bólý arqyly "Bıznestiń jol kartasy" baǵdarlamasynyń 2025 jylǵa deıin uzartylýy óńirdiń bıznes qaýymynyń ókilderin erekshe qýantqan sheshim boldy. Otandyq bıznestiń damýyna jyl saıyn 30 mlrd teńge qarastyrý mýltıplıkatıvti áleýmettik-ekonomıkalyq áser beretini sózsiz. Bul bizge berilgen jańa múmkindik. Biz Baǵdarlamanyń memlekettik qoldaý quraldaryn alýǵa qatysýdy jáne múmkindik bolǵan jaǵdaıda onyń jobasyn ázirleýge belsendi túrde aralasýdy josparlap júrgen kásiporyndardyń birimiz», — dedi Z. Gasanov.
Zııathan Gasanov óz kásipornyndaǵy eńbekaqy mólsherleri týraly aıtyp berdi: eń tómengi eńbekaqy — 120 myń teńgeni quraıdy, ortasha jalaqy — 353 myń tg. Sonymen qatar, kásiporynda Prezıdent Joldaýyna qoldaý bildirý aıasynda eńbekaqy mólsherin qosymsha arttyrý týraly sheshim qabyldanǵan.
Budan ózge, óńirdiń kásipkerler qaýymynan «Jarkent krahmal-sirne zaýyty» JShS dırektorlar keńesiniń basqarma tóraǵasy Zákirjan Kýzıev sóz sóıledi. Kásiporyn aýyl sharýashylyǵy ónimderin ótkizýge mamandandyrylǵan. Onyń aıtýynsha, ónimderdiń 63% Ortalyq Azııa, Qytaı jáne Reseı naryqtaryna eksporttalady.
«Elbasynyń Qazaqstan halqyna Joldaýyndaǵy birinshi tarmaq halyq tabysyn ósirýge arnalǵan. Oblys ákimdigi túsindirý jumystaryn júrgizdi. Osyǵan oraı, bizdiń kompanııa 1 jeltoqsannan bastap eńbekaqy mólsherin ulǵaıtady. Búgingi tańda bizde 1200 adam jumys isteıdi – bul negizinen aýyldyq eldi mekenderdiń turǵyndary. Ortasha jalaqy mólsheri qazirgi tańda 114 myń teńgeni quraıdy, eń tómengisi – 68 myń. Jalpy alǵanda kompanııa toby boıynsha eńbekaqy 1,5%-ǵa ósedi, bul 311 qyzmetkerge qatysty. Osylaısha, osy jyldyń 1 jeltoqsanynan bastap ortasha eńbekaqy 127 myń tg deıin, al tómengisi 80 myń tg deıin ósedi», — dep Z. Kýzıev, eńbekaqynyń ósýi kompanııa tabysy esebinen júzege asyrylatynyn aıtty.
Sóziniń sońynda Zákirjan Kýzıev bıznestiń basqa ókilderi de Memleket basshysynyń bastamasyna qoldaý bildirip, ózderiniń qyzmetkerlerine múmkindiginshe eńbekaqy mólsherin ulǵaıtatynynaa senim bildirdi.
