Qatysýshylar elde jáne álemde bolyp jatqan mańyzdy oqıǵalardy ádemi ázilmen astarlap jetkizýge tyrysty. Sondaı-aq, qoǵamdaǵy memlekettik til problemasyn qaljyńmen sheber kótere bildi.
Sharaǵa qatysty Qazaqstan KVN odaǵy respýblıkalyq jastar qoǵamdyq birlestiginiń prezıdenti Esen Eleýken:
– Bul shara kompanııanyń memlekettik tilge degen qurmetin, jastar arasyndaǵy, kompanııadaǵy qyzmetkerlerdiń bir-birimen emen-jarqyn baılanysyn kórsetedi degen oıdamyn. О́te jaqsy ıdeıa, jaqsy is-shara. Uzaǵynan bolǵaı,– degen pikir bildirdi.
Kompanııa qyzmetkerleriniń aıtýynsha, bundaı ortaq shara áriptester arasyndaǵy qarym-qatynasty jaqsartýǵa septigin tıgizedi.
«Energoınform» AQ qyzmetkeri Nurlan Qunafın:
– Bul shara, birinshiden, ujymdyq rýhty kóteredi. Ekinshiden, kompanııadaǵy memlekettik tildiń qoldanylý aıasyn, mártebesin kóteredi. Bıyl 9 fılıaldan 9 komanda qatysty, óte qyzyqty shara boldy,– deıdi.
Baıqaý qorytyndysy boıynsha Almaty qalasynan kelgen «APORT KEGOC» komandasy bas júldeni jeńip atandy. Júldeli birinshi oryn «NUR ENERGOINFORM» oıynshylaryna buıyrsa, ekinshi oryndy «Shyǵys JET» fılıaly, al úshinshi oryndy «Aqtóbe JET» fılıalynyń oıynshylary ıelendi. Jeńimpaz komanda men júldegerler kompanııa tarapynan syı-sııapattarǵa ıe boldy.
Erkejan AITQAZY,
«Egemen Qazaqstan»
