«NurOtanTalks» maqsaty – ulttyq mádenıetti álemge tanytý

Erkin oı alańyna qaty­sýshylar bul joly «Jahandaǵy zamanaýı qazaqstandyq mádenıet: bıik belester» taqyrybynda áńgime órbitti.

Elbasy óziniń «Bolashaqqa baǵdar: rýhanı jańǵyrý» baǵdarlamalyq maqalasynda: «Biz HHI ǵasyrdyń jahandyq kartasynda eshkimge uqsamaıtyn, derbes orny bar ult bolamyz desek, «Jahandaǵy zamanaýı qazaqstandyq mádenıet» jobasyn iske asyrýǵa tıispiz», – dep aı­ryqsha atap ótken bolatyn. Osylaısha, Memleket basshysy álem Qazaqstandy tabıǵı baı­ly­ǵymen nemese syrtqy saıasattaǵy iri bastamalarymen ǵana emes, mádenı jetistikterimen de tanýy kerektigin meńzedi.

Bul degenińiz, úlken qajyr-qaırat pen aýqymdy jumysty qajet etetin irgeli is. Sonyń ishinde ulttyq mádenıetimiz ben ónerimizdiń eń úzdik týyndylaryn tańdap alyp, olardy shetelderde jan-jaqty tanystyryp, qazaqy qundylyqtardyń aıasyn keńeıtýdiń bereri mol.

Is-sharany ashqan «Nur Otan» partııasy Tóraǵasynyń birinshi orynbasary otandyq mádenıetti álemdik arenaǵa shyǵarý arqyly oǵan degen kózqaras pen túsinikti taǵy bir jańa qyrynan ózgertýge bolatynyn aıtty. Munyń ulttyq qundylyqtarymyzǵa eń aldymen ózimizdiń suranysymyzdy arttyrýǵa jol ashatyn mańyzdy qadam ekeni sózsiz.

– Álemge tek tabıǵı baılyq­tary­myzben nemese syrtqy saıa­sattaǵy iri bastamalarymyz­ben ǵana emes, mádenıettegi je­tis­tikterimizben de tanylýdy al­dymyzǵa maqsat etip qoıdy. Ol úshin biz Qazaqstanmen birge búkil álemde úlken suranysqa ıe bolatyn óner týyndylaryn jazýǵa, shyǵarýǵa jaǵdaı jasaýymyz kerek. Sol arqyly álemdik mádenıettiń damýyna ózindik úlesimizdi qosa alamyz. Qazirdiń ózinde bul baǵytta aýqymdy jumystar atqarylýda. Máselen, qalamgerlerimizdiń týyndylary basqa tilderge aýdarylyp, ártisterimiz álemniń eń úzdik sahnalarynda óner kórsetýge múmkindik alyp jatyr. Osynyń barlyǵy «Rýhanı jańǵyrý» baǵdarlamasynyń naqty jemisi ekeni sózsiz, – dedi M.Áshimbaev.

Is-sharaǵa qatysýshylardyń bári qazaqstandyq kıno, mýzyka, jalpy ónerdiń damýyna úlken úlesterin qosyp júr­gen, osy sa­lada ózindik kózqara­syn qalyp­tastyrǵan qaırat­ker­ler. Son­­dyqtan olar qazaq­stan­dyq má­denıettiń básekege qabilet­tiligin arttyryp, otandyq ónerdiń kók­jıegin qalaı keńeıtýge bolatynyn óte jaqsy biletini sózsiz.

Taqyryp jaıynda pikir bil­dirgender arasynda Qurman­ǵazy atyndaǵy Qazaq ulttyq kon­ser­vatorııasynyń rektory, «Qa­zaqstandaǵy 100 jańa esim» (2017) jobasynyń jeńimpazy Arman Júdebaev, 71-shi Halyqaralyq Kann kınofestıvaliniń «Úzdik áıel róli» atalymy boıynsha je­ńim­pazy, belgili aktrısa Samal Eslıamova, Nıý-Iork kıno­akademııasynyń (MFA) túlegi, halyqaralyq jáne res­pýblıkalyq kınofes­tı­val­derdiń laýreaty, rejısser, ssenarııst, akter, dokýmentalıst Dıas Ázimjan jáne «TSE Art Destination» art-alańy men «Artios» kreatıvti agenttiginiń negizin qalaýshy, ónertanýshy, «Nur álem» Qazaqstan ulttyq pa­vılonyndaǵy qazirgi zamanǵy óner jıyntyǵy men «Astana Art Show» halyqaralyq kórmesiniń kýratory Dına Baıtasova boldy. Olar osy máselede óz oı­laryn ashyq aıtyp, utymdy usy­nys­taryn joldady.

Máselen, álemge tanymal kıno aktrısa Samal Eslıamova qazaqtyń dástúrli áni men kúıi eshqandaı álemdik óner týyndylarynan kem emestigin aıtty. «Shetelde kóp júrgen qazaq re­tinde dástúrli ánimiz ben kúıi­mizdiń mýzyka salasyndaǵy álem­dik shedevrlerden esh kem emes­tigin aıtqym keledi. Keıde alys­ta júrip, týǵan elińdi aýylyń­dy ańsaısyń. Sondaı kezder­de dástúrli ánderimiz ben kúı­lerimiz janǵa úlken demeý bo­latynyn baıqadym. Sol sebep­ti, biz mádenıet sala­synda álem­dik deńgeıge ózimiz­diń ulttyq bol­mysymyzben, asyl qundylyq­tarymyzben shyǵýy­myz kerek. О́ıtkeni olardyń barlyǵy su­ranysqa ıe. Tek nası­hat­taýdyń utymdy jolyn taba bilsek bol­ǵany», – dedi ol. 

Aıta keteıik, «Nur Otan» partııasy Saıası keńesiniń keńeıtilgen otyrysynda Memleket basshysy «Rýhanı jańǵyrý» baǵdarlamasy partııanyń ıdeologııalyq jumy­synyń negizgi tuǵyrnamasy bolýy kerektigine erekshe nazar aý­darǵan edi. Soǵan oraı partııa bul baǵdarlamany júzege asyrýǵa belsene qatysyp, júıeli jumys júrgizip keledi.

Joldybaı BAZAR,

«Egemen Qazaqstan»