Para bı boıynsha Astananyń ashyq chempıonatyna elimizdiń 6 aımaǵynyń (Astana, Shymkent qalalary, Túrkistan, Batys Qazaqstan, Qaraǵandy, Almaty oblystary) ókilderi qatysýda. Olardyń arasynda bı sportynan Álem jáne Azııa chempıondary men laýreattary bar. Ashylý saltanatyna Qazaqstan men Reseıdiń bı ujymdary qatysyp jatyr. Sondaı-aq, chempıonat aıasynda horeografııa jáne sahna bıinen balabaqsha tárbıelenýshileriniń de festıvali ótýde.
Odan bólek, erteń úsh birdeı sharanyń ashylýy bolady. Olar - QR ashyq chempıonaty, «Kazakhstan Open 2018» cherlıderler sportynan halyqaralyq týrnır jáne zamanaýı, estradalyq, halyqtyq jáne ártistik bı boıynsha halyqaralyq týrnır.
Atalǵan saıystarǵa Qazaqstannyń barlyq óńirinen, odan bólek Qyrǵyzstan, О́zbekstan jáne Reseı ónerpazdary qatysady. Bıshiler básekesi «Sen juldyzsyń» uranymen ótedi.
«Para bı sporty elimizde kásibı túrde 2009 jyldan bastap qolǵa alyndy. 2010 jyly barlyq óńirlerdegi Mádenıet jáne sport basqarmasynyń janynan para bı sporty bólimi jumys isteı bastady. Sodan beri Qazaqstan chempıonaty turaqty túrde ótkizilip keledi. Búginde 34 adamnan turatyn ulttyq qurama bar. Qazaqstan qurama komandasy jyl saıyn halyqaralyq jarystarǵa qatysyp júldemen oralady. Sózime dálel keltireıin, ústimizdegi jyly bizdiń sportshylar Polsha, Taıvan, Germanııa elderinde ótken halyqaralyq baıqaý men álem kýbogyna qatysyp, júldeli oryndar ıelendi. Jáne buny tek sport túri ǵana emes, taǵdyry erekshe jandardyń basyn qosatyn mereke dep aıtýǵa bolady», - dedi QR Zamanaýı jáne sporttyq bı federasııasynyń prezıdenti Álııa Túsipbekova.
Uıymdastyrýshylardyń aıtýynsha, atalǵan baıqaý qatysýshylarǵa bıyl ótetin Álem jáne Azııa chempıonatyna lısenzııa alýǵa, sondaı-aq sporttyq dáreje ıelenip, ulttyq quramaǵa kirýge múmkindik beredi. Iаǵnı úzdik dep tanylǵandar elimizdiń atynan álemdik jarystarǵa qatysady.
Osymen jetinshi ret uıymdastyrylyp otyrǵan týrnır qatysýshylar úshin jyldyń basty oqıǵasy sanalady. Olardyń aıtýynsha, bul sharalar óner kórsetýmen qatar, bir-birimen aralasyp, ózara tájirıbe almasý úshin de mańyzdy. 2011 jyly bastaý alǵan óner saıysy 7 jyldyń ishinde 15 myńnan astam bıshiniń basyn qosqan.
Sharany uıymdastyrýshylar - Zamanaýı jáne sporttyq bı federasııasy men Astana qalasynyń sporttyq bı federasııasy. Chempıonat QR Mádenıet jáne sport mınıstrligi, Astana qalasynyń ákimdigi jáne Astana qalasy mádenıet jáne sport basqarmasynyń qoldaýymen ótip jatyr.
