Erler saıysynda 81 kılo salmaq dárejesinde Azııa chempıony Aıdar Qazov kúsh synasty. Bıyl el birinshiliginde óte jaqsy nátıje kórsetip, altyn tuǵyrǵa kóterilgen qandasymyz tórtkúl dúnıeniń myqtylary bas qosqan dodada qalyń toptyń arasynda qalyp qoıdy. Qazovtyń qossaıystaǵy kórsetkishi – 331 (145+186) kılo. Nátıjesi – 19 oryn.
Bul salmaqta altyn jáne qola júldeni Qytaıdyń qos sańlaǵy – Lıýı Sıaoszıýn men Daıýn Lı oljalasa, mysyrlyq Ahmed Mahmut kúmiske qol sozdy.
Áıelder arasynda 64 kılo salmaqta baq synaǵan Ásem Sadyqova men Karına Gorıcheva «V» tobyndaǵy básekede birinshi jáne ekinshi oryndardy ózara bóliskenimen, olardyń eńsergen salmaqtary jalpy esepte úzdikter qatarynan kóriný úshin jetkiliksiz boldy. Nátıjesinde Ásem – jetinshi, Karına – segizinshi oryndy qanaǵat tutty. Osy oraıda, julqyp kóterý jattyǵý boıynsha 107 kılolyq ziltemirdi kótergen Karına Gorıchevanyń kishi qola medaldi enshilegenin aıta ketýge tıispiz.
Al jarys qorytyndysy boıynsha qossaıystaǵy barlyq júlde sary qurlyq ókilderine buıyrdy. Atap aıtsaq, qytaılyq Den Veı – altyn, soltústikkoreıalyq Rım Ýn Sım-kúmis jáne taılandtyq Rattanavan Vamalýn – qola medaldi ıemdendi.
Ǵalym SÚLEIMEN,
«Egemen Qazaqstan»
