Shara barysynda, ádettegideı, Astana ákiminiń orynbasary Ermek Amanshaev konkýrsanttarǵa sáttilik tilep, elorda basshylyǵynyń atynan baıqaýdy daıyndap, uıymdastyrǵandarǵa, sondaı-aq qazylar alqasynyń músheleri men qonaqtarǵa – tyǵyz jumys kestelerine qaramastan ýaqyt taýyp, «Shabyt» festıvaline kelgen tanymal óner sheberlerine alǵysyn bildirdi.
- Memleket basshysy qazaqstandyq jastardyń shyǵarmashylyǵyn damytýǵa aıyryqsha kóńil bóledi. Jaqynda halyqqa Joldaýynda Respýblıka Prezıdenti Nursultan Ábishuly Nazarbaev kelesi jyldy jastar jyly dep jarııalady. Búginde jer-jerlerde jáne memlekettik deńgeıde, Astana ákimdiginiń deńgeıinde úlken keshendi baǵdarlama ázirlenýde, onda jastardy, onyń ishinde elimizdiń jáne elordamyzdyń shyǵarmashyl jastaryn qoldaýdyń túrli sharalary qarastyrylady. Osymen, «Shabyt» 21-ret ótkizilip otyr. Festıval elordamyzben birge dúnıege kelip, birge jasap, órkendep keledi, shyǵarmashylyq pen óner shyńdaryn baǵyndyrýda. Jyl saıyn kózderinde ot oınaǵan, sózderinde jalyn bar jas talanttarymyzdy qarsy alamyz, - dedi Ermek Amanshaev.
Sóz sońynda elorda basshysynyń orynbasary «Shabyt» shyǵarmashyl jastar festıvaliniń negizin qalaýshylardyń biri QR eńbek sińirgen qaıratkeri Tólegen Muhamedjanov pen professor, óner ýnıversıtetiniń rektory. Olardy el ishinde aýqymdy baıqaýdyń «ata-anasy» dep atap ketken.
- Astananyń jáne bizdiń ýnıversıtetimizdiń 20 jyldyǵy atap ótiletin jyly festıval 21-ret ótkizilmek. Baıqaýdyń barsha álem boıynsha tabynýshylary bar, onyń laýreattary mádenıet qaıratkerleri atanyp júr dep zor maqtanyshpen, qýana aıta alamyz, - dedi Aıman Qojabekqyzy. Ol konkýrsanttarǵa joǵary deńgeıde óner kórsetýdi tiledi.
Tólegen Muhamedjanov festıvaldiń paıda bolǵan tarıhyna toqtaldy. 20 jyl buryn Qazaqstan Prezıdenti onyń usynǵan ıdeıasyn qoldap, baıqaýdy óz qamqorlyǵyna alǵan.
- Nursultan Ábishuly birinshi festıvaldi ózi ashty, zalda otyryp, qatysýshylardy qoshemettedi. Sondyqtan festıvaldiń bastamasy jaqsy boldy, búgin de osy joldan taımaı keledi. Bir kezderi óner kórsetken jastar qazir 40-tan asty, keıbiri 50-ge kep qaldy. Keıbiri búgin qazylar alqasynyń quramynda otyr, endi sizderdiń ónerlerlerińizdi baǵalaıdy. Sabaqtastyq degen osy, bul urpaqtan-urpaqqa beriletin estafetanyń sımvoly deýge bolady. Jastarǵa óz ónerlerin jarqyn, batyl kórsetýlerin jáne sáttilik pen baqyt tileımin! – dedi Tólegen Muhamedjanov.
«Shabyt» festıvaliniń saltanatty ashylýy bıylǵy nomınasııalar boıynsha básekege túsetin konkýrsanttardyń óner kórsetýimen jalǵasty. Halyqaralyq konkýrstardyń jeńimpazdary men laýreattary Aslana Gýmarova, Nuraı Myqty, «Bastaý» dýeti, sondaı-aq, Vıtebskide «Slavıan bazary-2018» baıqaýynyń altyn júldesin alǵan, Ámire atymen tanymal bolǵan Ernar Sadyrbaev óz ónerlerin ortaǵa saldy. Konsert sońynda sahnaǵa Qaırat Baekenov pen «Format» toby shyqty. Aıta keteıik, ujym solısteri de festıval laýreattary bolyp tabylady.
Ústimizdegi jyly baıqaýǵa qatysýǵa 613 adam nıet bildirdi. Olardyń basym bóligi Astananyń namysyn qorǵaıdy. Jyldan jylǵa qatysýshylar geografııasy keńeıse, qazylar alqasy músheleriniń sany artýda. Konkýrsanttar arasynda barsha Qazaqstannyń jastary, sonymen qatar Reseı, Belarýs, Ýkraına, Grýzııa, Izraıl, Bashqutstan, Qyrǵyzstan, Ázerbaıjan, О́zbekstan memleketteriniń de ókilderi bar.
Eske salaıyq, baıqaý baǵdarlamasyna 5 negizgi nomınasııa engen: Klassıkalyq mýzyka, Halyq mýzykasy, Estradalyq vokal, Horeografııa, Jýrnalıstıka.
Keıbir nomınasııalar seksııalarǵa bólinedi, olardyń árqaısysynda negizgi júldeli oryndar men Gran-prıden basqa, tanymal óner qaıratkerleriniń qurmetine arnaıy ataýly dıplomdar da qarastyrylǵan.
- Jyl saıyn 10-20 nomınasııadan ótkizý óte qıyn. SOndyqtan, olardy ózgertip otyrý týraly sheshim qabyldadyq. Bıylǵy baıqaýdyń ereksheligi sońǵy ret 2011 jyly bolǵan jýrnalıstıka nomınasııasynyń engizilgendigi. Bıyl ony qaıta qostyq. Qatysýshylar men qazylar alqasynyń músheleriniń geografııasy ártúrli. Qazylar alqasynyń quramynda, Reseı, Ýkraına, Qyrǵyzstan sııaqty kórshi memleketterdiń, Avstrııa, Germanııa, Grýzııa, Makedonııa, Izraıl, Sheshenstan Respýblıkasynyń kórnekti mádenıet qaıratkerleri de bar. Baıqaý týraly tórtkúl dúnıede biledi, - dedi Astana ákimdiginiń Mádenıet jáne sport basqarmasy basshysynyń orynbasary Narıma Muhambetalına.
