Memleket basshysy «Astana Hab» IT-startaptar halyqaralyq tehnologııalyq parkiniń ashylý rásimine qatysqany úshin Estonııa Respýblıkasynyń Premer-Mınıstrine rızashylyq bildirdi.
Qazaqstan Prezıdenti Estonııanyń sıfrlyq tehnologııalar salasyndaǵy tájirıbesi mol ekenin atap ótti.
Nursultan Nazarbaev eki el arasyndaǵy saýda baılanystaryn nyǵaıtý qajettigin aıtyp, ekonomıkalyq yntymaqtastyqty damytýdyń basym baǵyttaryna toqtaldy. Memleket basshysy elimizde iske asyrylyp jatqan ınfraqurylymdyq baǵdarlamalar men solardyń aıasynda boı kóterip kele jatqan nysandar jáne kólik-tranzıt áleýetin arttyrý jónindegi jobalardyń nátıjeleri týraly aıtty.
Sonymen qatar, Memleket basshysy qaıta óńdeý jáne agrarlyq ónerkásip, farmasevtıka salalarynda jáne ekonomıkanyń basqa da sektorlarynda yntymaqtastyqty bir jolǵa qoıýdyń mańyzdy ekenin atap ótti.
Estonııa Respýblıkasynyń Premer-Mınıstri qonaqjaılyq kórsetkeni úshin Qazaqstan Prezıdentine alǵys aıtyp, óziniń Astanaǵa alǵashqy saparynan alǵan áserin ortaǵa saldy.
– Keshe Premer-Mınıstr Baqytjan Saǵyntaevpen syndarly kelissóz júrgizdik. Men Qazaqstanǵa alǵash ret kelip otyrmyn. Astananyń ınfraqurylymdyq nysandaryna qarap, elderińizdiń qalaı damyp kele jatqanyn kórýge bolady, – dedi Iý.Ratas.
Estonııa Respýblıkasynyń Premer-Mınıstri sıfrlandyrý jáne kólik-logıstıka salalarynda birlesken jobalardy iske asyrýǵa, sondaı-aq ınvestısııalyq yntymaqtastyqty keńeıtýge múddelilik tanytty.
