Konferensııa jumysyna «Nur Otan» partııasy Ortalyq apparatynyń Hatshysy Qanybek Jumashev, «Nur Otan» partııasy Jambyl oblystyq partııasynyń tóraǵasy, oblys ákimi Asqar Myrzahmetov, partııa oblystyq fılıaly Saıası keńesiniń, Saıası keńesi Bıýrosynyń músheleri, partııa Taraz qalalyq, aýdandyq fılıaldarynan saılanǵan delegattar, etnomádenı birlestik jetekshileri, ÚEU tóraǵalary, BAQ jetekshileri, saıası partııalar, jergilikti atqarýshy jáne quqyq qorǵaý organdarynyń basshylary qatysty. Konferensııa barysynda fılıaldyń sońǵy eki jylda atqarǵan jumystary keńinen talqylanyp, bastaýysh partııa uıymdarynyń belsendiligin arttyrý, ishkipartııalyq tártipti nyǵaıtý, partııa aktıviniń jaýapkershiligin arttyrý mindetteri alǵa qoıyldy.
Konferensııada «Nur Otan» partııasy Jambyl oblystyq fılıaly tóraǵasynyń birinshi orynbasary Erqanat Manjýov partııa oblystyq fılıalynyń eki jylda atqarǵan jumystary men jetistikteri jáne alda turǵan mejeli mindetteri jóninde baıandady. Búgingi tańda oblys boıynsha 337 bastaýysh partııa uıymynda 69039 partııa múshesi bar. Partııa músheleri qataryna belsendi jastar, óndiris salasyndaǵy jas mamandar, shaǵyn jáne orta bıznes ókilderi, sportshylar men mádenıet salasynyń ókilderi toptastyrylǵan. Sonymen qatar, jıyn barysynda aǵymdaǵy jyldyń shilde aıynan beri partııanyń 20 bastamashyl jobasynyń da qolǵa alynǵany aıtyldy. Atalǵan jobalardyń ishinde bastaýysh uıymdardyń jumysy men eseptiligin sıfrlandyrýǵa kóshirýge baǵyttalǵan «Partııanyń avtomattandyrylǵan derekqory», «E-Jarnalar», «E-Taldaý», «E-qujat aınalymy», «Balalarǵa arnalǵan tegin IT synyptar» syndy jańa formattaǵy jobalary bar. Búgingi tańda Taraz qalasy men aýdandarda balalarǵa arnalǵan tegin 12 IT synyptar ashylǵan. Atalǵan synyptarda 1300 oqýshy bilim alýda. Sonymen qatar, «Ardagerlerdi ardaqtaıyq», «Kedergisiz keleshek», «Sátti qadam» syndy áleýmettik máni zor jobalar týraly da aıtyldy.
Konferensııa barysynda partııa oblystyq fılıaly baqylaý-tekserý komıssııasynyń tóraǵasy Jarylqasyn Aıtaqov atqarylǵan jumystar boıynsha esep berse, partııa oblystyq fılıalynyń partııalyq baqylaý komıssııasy tóraǵasynyń orynbasary Baqyt Álmuratov, partııa oblystyq fılıaly janyndaǵy Sybaılas jemqorlyqqa qarsy is-qımyl jónindegi qoǵamdyq keńestiń tóraǵasy Bahtııar Aldashov baqylaý jumystarynyń nátıjelerine toqtaldy. Sonymen qatar, jıynda «Prezıdenttiń bes áleýmettik bastamasy» atty halyqqa Úndeýiniń iske asyrylýyn baqylaý jónindegi oblystyq qoǵamdyq keńestiń jumysy týraly da aıtyldy.
Konferensııada partııa Merki aýdandyq fılıalynyń tóraǵasy, aýdan ákimi Meıirhan О́mirbekov, partııa Jýaly aýdandyq fılıaly tóraǵasynyń birinshi orynbasary Anar Ahmetova, partııa Jambyl aýdandyq fılıaly «Jetitóbe» bastaýysh partııa uıymynyń tóraıymy Samal Baıkeeva jáne oblystyq «Jas Otan» Jastar qanatynyń tóraǵasy Ýálıhan Bolatbek esepti kezeńdegi atqarylǵan jumystardyń nátıjesin baıandady. Budan keıin «Nur Otan» partııasy Ortalyq apparatynyń Hatshysy Qanybek Jumashev partııa tarapynan atqarylyp jatqan jumystarǵa toqtaldy. «Elbasy, «Nur Otan» partııasynyń Tóraǵasy Nursultan Nazarbaevtyń tapsyrmasymen elimizde ekonomıkalyq, saıası jáne áleýmettik jańǵyrý jumystary júzege asyrylýda. Bizdiń saıası uıym osy ózgeristerdiń eshqaısysynan da qalys qalmaı, aýyldarda oryndalýyna zer salatyn bolady. Partııanyń óz ishinde de aýqymdy jańǵyrtý jumystary bastaldy», dedi óz sózinde Qanybek Bekbolatuly.
Konferensııa jumysyn partııa oblystyq fılıalynyń tóraǵasy, oblys ákimi Asqar Myrzahmetov qorytyndylap, memlekettik baǵdarlamalardy júzege asyrýda partııa músheleri aldyńǵy shepte turýy kerektigin aıtyp, tıisti basshylarǵa naqty tapsyrmalar berdi. Sońynda partııa oblystyq fılıaly Saıası keńesiniń quramy saılanyp, Saıası keńestiń alǵashqy otyrysy ótti. Saıası keńes otyrysynda partııa oblystyq fılıaly Saıası keńesi Bıýrosynyń jańa quramy saılandy.
Hamıt ESAMAN,
«Egemen Qazaqstan»
Jambyl oblysy
