Beıindi mınıstrlikterdiń jáne birqatar ákimderdiń baıandamalaryn tyńdaǵannan keıin, B. Saǵyntaev jalpy 9 aıdyń qorytyndysy boıynsha «Nurly jer» memlekettik baǵdarlamasynyń barlyq negizgi baǵyttary boıynsha ósim baıqalatynyn atap ótti. Sonymen qatar, Premer-Mınıstr Úkimet músheleriniń nazaryn birqatar basty aspektige aýdardy.
Birinshi — bul Memlekettik baǵdarlamany iske asyrýǵa bólingen qarajatty ıgerý máselesi. QR Investısııalar jáne damý mınıstrliginiń aqparatyna sáıkes, birqatar óńirde 9 aıdyń qorytyndysy boıynsha ótken jylǵy jáne josparly kórsetkishtermen salystyrǵanda qarajatty ıgerý qarqyny tómendegen.
О́tken jyly 11,2 mln sharshy metr turǵyn úı tapsyryp, joǵary kórsetkishke qol jetkizildi. Premer-Mınıstr bıyl 12,1 mln sharshy metr paıdalanýǵa berý kerektigin eske saldy.
Osyǵan oraı, oblystardyń ákimderine turǵyn úıdiń josparlanǵan kólemin tapsyrý jáne bólingen qarajatty tıimdi ıgerý úshin qajetti sharalardyń barlyǵyn qabyldaý tapsyryldy.
Ekinshi — qurylys alańdaryna ınjenerlik kommýnıkasııalardy jetkizý máselesi. Bul kóppáterli úılerge de, jeke úı qurylysyna da qatysty. Bıyl Memlekettik baǵdarlamany iske asyrýǵa bólingen bıýdjet qarajatynyń jartysyna jýyǵy osy baǵytqa kózdelgen. Sonymen qatar, B. Saǵyntaev keıbir óńirlerde qajetti ınfraqurylym bolmaǵandyqtan, salynyp daıyn turǵan úıler paıdalanýǵa berilmeı otyrǵanyn aıtty.
Jeke turǵyn úı boıynsha osy jyly 40 myńnan astam jer telimi jelimen qamtamasyz etilýge tıis, 9 aıda tek 40% ǵana qamtamasyz etilgen. Sondyqtan oblystardyń ákimderine osy máseleni qatań baqylaýǵa alyp, tapsyrmalardyń aldaǵy eki aıda oryndalýyn qamtamasyz etý tapsyryldy.
Qazaqstan halqyna arnaǵan Joldaýynda Elbasy 2019 jyly jańa «Nurly jer» baǵdarlamasyn ázirleý mindetin qoıdy. Ony óńirlik damý aspektilerin eskerip, jańa baǵyttarmen tolyqtyrý qajet. QR Investısııalar jáne damý mınıstrligine jańa memlekettik baǵdarlamada turǵyn úı qurylysy men turǵyn úı-kommýnaldyq sharýashylyq máselesi boıynsha barlyq aspektilerdi qarastyrý tapsyryldy.
