Oraıy kelgende aıta keteıik «All About Photo» qory – paıdasy mol jáne óte keń foto málimetter bazasy jınaqtalǵan qurylym. Resýrstyń basty maqsaty – álem fotograftarynyń jumysyn júıelep otyrý. Alǵash ret 2013 jyldyń aqpan aıynda AQSh-tyń Kalıfornııa shtaty, San-Fransısko qalasynda iske qosylǵan eken. Azǵana ýaqyt ishinde fotoqor jasaýdan álemge tanylǵan. Bul jerden kez kelgen taqyryp boıynsha qajet fotosýretti taýyp alýǵa bolady. Munda arnaıy onlaın-jýrnal shyǵady, sonymen qatar veb-saıty jáne fotolaboratorııasy, stýdııasy, oqý sheberhanasy, mýzeı, galereıa, kórme zaly bar.
Al myna úzdik fotonyń avtory – ulybrıtanııalyq fotograf Tarık Zaıdı. Sýret jýyqta Baı-ólke aımaǵynyń Saqsaı sumyn jeri «Biteý» deıtin kúzeýlikte túsirilgen eken. Atqa minip, aldyna nemeresin mingestirip, baldaǵyna qus qondyrǵan aqsaqaldyń aty – Báıten Babıuly. Bákeń týraly «Egemen Qazaqstan» gazetiniń 23 tamyz kúngi №159 sanynda «Etnografııalyq áńgime» aıdarymen «Qyran ustaý qazaqtyń en-tańbasy» atty kólemdi suhbat jarııalanǵan-tyn. Osy suhbatta jasy 85-ten asqan aqsaqal qolyna qus qondyryp, búrkitshilikpen aınalysqanyna 60 jyl bolǵanyn aıtyp, myna bir qanatymen jelkesin kómkerip turǵan búrkitin 33-shi qusym degen edi... Endi mine qazaqtyń etnoturmysyn buzbaı saqtap otyrǵan qarııanyń isi sheteldikter tarapynan úzdik degen atqa ıe bolyp otyr.
Beken QAIRATULY,
«Egemen Qazaqstan»
