Jas talanttar asyǵa kútetin baıqaýdyń saltanatty ashylýy Beıbitshilik jáne kelisim saraıynda ótti. Astana qalasy ákiminiń orynbasary Ermek Amanshaev qatysýshylarǵa sáttilik tilep, elorda basshylyǵynyń atynan baıqaýdy daıyndap, uıymdastyrǵandarǵa, sondaı-aq qazylar alqasynyń músheleri men qonaqtarǵa, «Shabyt» festıvaline kelgen tanymal óner juldyzdaryna alǵysyn bildirdi.
– Memleket basshysy qazaqstandyq jastardyń shyǵarmashylyǵyn damytýǵa aıryqsha kóńil bóledi. Jaqynda halyqqa Joldaýynda Respýblıka Prezıdenti Nursultan Ábishuly Nazarbaev kelesi jyldy Jastar jyly dep jarııalady. Búginde jer-jerlerde jáne memlekettik deńgeıde, Astana ákimdiginiń deńgeıinde úlken keshendi baǵdarlama ázirlenýde, onda jastardy, onyń ishinde elimizdiń jáne elordamyzdyń shyǵarmashyl jastaryn qoldaýdyń túrli sharalary qarastyrylady. Osymen «Shabyt» 21-ret ótkizilip otyr. Festıval elordamyzben birge dúnıege kelip, birge jasap, órkendep keledi, shyǵarmashylyq pen óner shyńdaryn baǵyndyrýda. Jyl saıyn kózderinde ot oınaǵan, sózderinde jalyn bar jas talanttarymyzdy qarsy alamyz, – dedi E.Amanshaev.
Qazaqstannyń eńbek sińirgen qaıratkeri, kompozıtor Tólegen Muhamedjanov pen Qazaq ulttyq óner ýnıversıtetiniń rektory, professor Aıman Qojabekqyzy − «Shabyt» shyǵarmashyl jastar festıvaliniń negizin qalaǵandar. Dál osy sebepti de olardy el ishinde baıqaýdyń «ata-anasy» dep atap ketken.
– Baıqaýdyń barsha álem boıynsha tabynýshylary bar, onyń laýreattary búginde mádenıet qaıratkerleri atanyp júr dep zor maqtanyshpen, qýana aıta alamyz, – degen Aıman Qojabekqyzy konkýrsanttarǵa joǵary deńgeıde óner kórsetýdi tiledi.
Al Tólegen Muhamedjanov festıvaldyń alǵash shymyldyǵyn ashqan kúnderin eske alyp, taǵylymdy tarıhqa bir sát kóz júgirtti.
– Nursultan Ábishuly birinshi festıvaldy ózi ashty, zalda otyryp, qatysýshylardy qoshemettegen bolatyn. Bir kezderi óner kórsetken jastardyń aldy 40-tan asyp, «Shabyt» jaqqan shyraqtardyń keıbiri búgin qazylar alqasynyń quramynda otyr. Urpaqtar sabaqtastyǵy degen osy, bul urpaqtan-urpaqqa beriletin estafetanyń sımvoly deýge bolady. Jastarǵa sáttilik pen baqyt tileımin!, – dedi T. Muhamedjanov.
«Shabyt» festıvaliniń saltanatty ashylýy bıylǵy atalymdar boıynsha básekege túsetin konkýrsanttardyń óner kórsetýimen jalǵasty. Halyqaralyq konkýrstardyń jeńimpazdary men laýreattary Aslana Gýmarova, Nuraı Myqty, «Bastaý» dýeti, sondaı-aq Vıtebskide «Slavıan bazary-2018» baıqaýynyń altyn júldesin alǵan, Ámire atymen ataǵy shyqqan Ernar Sadyrbaev óner kórsetip, Qaırat Baekenov pen «Format» ujymy solısteri de sahnada án saldy.
Bıylǵy baıqaýǵa qatysýǵa elimizdiń túkpir-túkpirinen 613 adam nıet bildirgen. Konkýrsanttar arasynda barsha Qazaqstannyń jastary, sonymen qatar Reseı, Belarýs, Ýkraına, Grýzııa, Izraıl, Bashqurtstan, Qyrǵyzstan, Ázerbaıjan, О́zbekstan memleketteriniń de ókilderi bar. Baıqaý baǵdarlamasyna klassıkalyq mýzyka, halyq mýzykasy, estradalyq vokal, horeografııa, jýrnalıstıka syndy 5 negizgi atalym enip otyr. Keıbir atalymdar seksııalarǵa bólinedi, olardyń árqaısysynda negizgi júldeli oryndar men Gran-prıden basqa, tanymal óner qaıratkerleriniń qurmetine arnaıy ataýly dıplomdar da qarastyrylǵan.
– Jyl saıyn 10-20 atalymnan ótkizý óte qıyn. Sondyqtan olardy ózgertip otyrý týraly sheshim qabyldadyq. Bıylǵy baıqaýdyń ereksheligi, sońǵy ret 2011 jyly bolǵan jýrnalıstıka atalymynyń engizilgendigi. Bıyl ony qaıta qostyq. Qatysýshylar men qazylar alqasynyń músheleriniń geografııasy ártúrli. Qazylar alqasynyń quramynda Reseı, Ýkraına, Qyrǵyzstan sııaqty kórshi memleketterdiń, Aýstrııa, Germanııa, Grýzııa, Makedonııa, Izraıl Respýblıkasynyń kórnekti mádenıet qaıratkerleri de bar. Baıqaý týraly tórtkúl dúnıe de biledi, − deıdi Astana ákimdiginiń Mádenıet jáne sport basqarmasy basshysynyń orynbasary Narıma Muhambetalına.
Aıa О́MIRTAI,
«Egemen Qazaqstan»
