Eki aıǵa sozylǵan baıqaý nátıjesine sáıkes tórt jeńimpaz irikteldi. Almaty memlekettik servıs jáne tehnologııalar kolledjinen Gúljanat Úsenbaeva, Almaty memlekettik polıtehnıkalyq kolledjinen Naǵashkúl Kosereva, Almaty tehnologııa jáne florıstıka kolledjinen Aıda Bolatova, Almaty tehnologııa jáne florıstıka kolledjinen Aqjarqym Qurmanalıeva ınklıýzıvti bilim berýdiń erekshelikteri men oqytý barysyndaǵy kókeıtesti máseleleri týraly usynystaryn bildirdi.
Komıssııa tóraǵasy, QR UǴA akademıgi, professor Qaırolla Rahımov «Múmkindigi shekteýli azamattarymyzǵa kóbirek kóńil bólý kerek» dep Memleket basshysy atap ótkenindeı, «Ustazdar úıi» ótkizip otyrǵan shara ýaqyt talabynan týyndap otyr, dep atap ótti. Búginde Almaty qalasyndaǵy 82 kolledjdiń 3-ýi ınklıýzıvti bilim berý baǵdarlamasymen jumys isteıdi. Osy shara aıasynda erekshe muqtajdyqtary bar balalarǵa bilim berýdiń ózekti máseleleri qozǵaldy. Baıqaý saladaǵy jetispeýshilikti anyqtap, ary qaraı damýyna mol múmkindik beretini sózsiz.
Abaı atyndaǵy QazUPÝ Pedagogıka-psıhologııa ınstıtýtynyń arnaıy bilim berý kafedrasynyń aǵa oqytýshysy, Phd doktory Laýra Býtabaevanyń aıtýynsha, qazirgi kezde ýnıversıtettegi Arnaıy bilim berý kafedrasynda defektolog mamandar daıarlanýda. Qyryq jyldan astam tarıhy bar kafedrada osy jyldar aralyǵynda sýrdopedagog, logoped, tıflopedagog, olıgofrenopedagog sııaqty mamandar daıarlanyp keledi. Sońǵy jyldarda erekshe muqtajdyqtary bar balalardy oqytýda ınklıýzıvti bilim berý júıesiniń ózektiligi baıqalady. Osy maqsatta «Inklıýzıvti bilim berý mamany» degen mamandyq ashyldy. Pedagogıkalyq mamandyqtaǵy stýdentterdiń barlyǵy derlik ınklıýzıvti bilim berý kýrstarynan ótip, balalarmen jumys isteýdiń ádistemesin ıgerip shyǵady. Ári erekshe muqtajdyqtary bar balalarmen jumys isteıtin oqytýshylar úshin qandaı ádister, baǵdarlamalar qajettiligine de basymdyq beriledi. Ýnıversıtette sonymen qatar múgedektigi bar balalardy qoldaıtyn resýrstyq ortalyq bar. Bul maqsatta shetel tájirıbeleri de nazarǵa alynady. Laýra Asqarqyzynyń aıtýynsha, erekshe qajettilikteri bar balalar kóp jaǵdaıda kásiptik bilim berý mekemelerinde oqyp, keıinnen joǵary bilim júıesine keletindikten «О́rleý» BAUO» AQ fılıaly ótkizip otyrǵan osyndaı sharanyń mańyzy zor.
«О́rleý» BAUO» AQ fılıaly Almaty qalasy boıynsha PQBAI dırektory Raısa Sadvakasova alǵashqy ret ótkizilip otyrǵan baıqaýdyń ereksheligine toqtaldy. Memleket saıasaty erekshe muqtajdyqtary bar balalarǵa ózge balalarmen teń quqyly bilim berýdi maqsat etedi. Balalarmen ǵana emes, ata-anamen de jumys isteýge týra keletin ustazdarǵa qoıylatyn talap ta ózgeshe.
Salada búginde sýrdoaýdarmashylar, logopedter, t.b. mamandar tapshy. Sondyqtan mektepterde pedagog mamandyǵy nasıhattalyp, Elbasy Joldaýynda atap ótilgenindeı ustaz mártebesi arttyrylýy tıis.
«Jaqynda «Qazaqstannyń 100 esimi» jobasynyń jeńimpazy Anar Ábjanovamen kezdesýimizde nashar estıtin balalarǵa arnalǵan kórkemsýret mektebin ashqysy keletindiginen habardar boldyq. Bul usynysty ata-analar da quptap otyr. О́ıtkeni, erekshe muqtajdyqtary bar balalar ózderine erekshe nazar aýdarýdy talap etedi ári olardyń shyǵarmashylyq túısigi de basqasha. Sondyqtan da mundaı baǵyttaǵy bilim ortalyqtarynyń balalar qabiletin damytýdaǵy róli zor. Almatyda qazirgi kezde nashar estıtin balalar №49, 116 mektepterde bilim alýda», deıdi Raısa Adjarqyzy.
Qazaqstan Respýblıkasy Prezıdenti N. Nazarbaevtyń joldaýlaryndaǵy mindetterdi oryndaý barysynda birinshi kezekte jaratylystaný baǵytyndaǵy mamandardy, ınjener, tehnologtardy daıyndaý, sonymen qatar avtomattandyrý, robottandyrý aımaǵyndaǵy bilimdi tereńdetý, jasandy ıntelektini zerdeleý mindeti qoıylǵan. Osyǵan oraı, elimizde robototehnıka jáne STEM oqytý keńinen qanat jaıýda. Búginde «О́rleýdiń» Almaty qalasyndaǵy fılıalynda Robototehnıka boıynsha muǵalimderdi daıarlaý qysqa merzimdi biliktilikti arttyrý kýrstarynda LEGO® MINDSTORMS® EV3 oqý konstrýktorlary men Arduino kontrolerin paıdalanyp tájirıbe jumystary jasalady. Tyńdaýshylar alǵan teorııalyq bilimderi boıynsha túrli robottar men Arduino-ǵa negizdelgen qurylǵylardy qurastyryp, baǵdarlama jasaýdy úırenedi. О́tken jyly ınstıtýttyń aǵa oqytýshysy Qaısar Nurlybaevtyń ǵylymı jetekshiligimen №152 mektep-gımnazııa muǵalimi Ahmetov B.T. kýrs barysynda robot-arba qurastyrdy. «Robokómekshi» arbasy múmkindigi shekteýli, zaǵıp jandardyń ómir qaýipsizdigin jáne ońtaıly qozǵalýyn qamtamasyz etedi. Arnaıy baǵdarlamaǵa qurylǵan robot júrgizýshi kómeginsiz qala kóshelerinde emin-erkin qozǵalady. Bul joba ál-Farabı atyndaǵy Qazaq ulttyq ýnıversıtetiniń bazasynda ótken «KazRoboSport-2018» respýblıkalyq chempıonatynda jeńimpaz atandy. Bul joba aldaǵy ýaqytta patentteletin bolady.
Elvıra SERIKQYZY,
«Egemen Qazaqstan»
