Buryn sońdy bolmaǵan deńgeıdegi xalyqaralyq kórmege 450 kompanııadan turatyn eń úlken delegasııamen qatysyp otyrǵan Japonııa men ekinshi oryndaǵy Ońtústik Koreıadan keıin AQSh-tyń da 180 kompanııasy, jalpy 172 eldiń 3600 kompanııasy qatysyp otyr.
5 qazanda kórmeniń ashylý rásiminde sóz sóılegen QHR tóraǵasy Sı Szınpın:
- «Qytaı ekonomıkasy kishkentaı kól emes, ol orasan zor muxıt», - deı kele, - «Bizdiń el ımportqa salynatyn kedendik salyqtardy tómendetetin bolady jáne aldaǵy 15 jylda shet elderden 40 trıllıon dollarǵa taýar ımporttaıtyn bolady», - dep, 1.4 mlrd. xalqy bar dáý Qytaıdyń qandaı nán, qandaı orasan zor naryq ekenin basa aıtty.
- «Ekonomıkanyń jahandanýy tabıǵı jáne tarıxı úrdis, oǵan jeke bir adam qarsy tura almaıdy», - degen Sı Szınpın atyn atamaǵanmen AQSh prezıdenti D.Tramptyń júrgizip otyrǵan saýda saıasatyna syn aıtty.
- «Árbir el proteksıonızm men ýnılateralızmge qarsy turýy kerek», - dep, jasandy ıntellekt sııaqty ınnovasııalyq- texnologııalyq jańǵyrý jaıynda da, - «Álsiz ólip, myqty qalatyn, jeńilgen azben qalatyn, jeńgen bárin alatyn saıasat tuǵyryqqa ákep tireıdi», - dep, jańa texnologııalardyń shetel asyp ketpeýine tosqaýyl qoıyp otyrǵan AQSh-tyń bul saladaǵy saıasatyn da synap ótti.
1 qazanda ǵana telefon arqyly sóılesken D.Tramp pen Sı Szınpınniń osy aıdyń sońyna josparlanyp otyrǵan kelissózderiniń basym bóligi dál osy taqyryptardyń tóńireginde boltynyn boljaýǵa bolatyn sııaqty.
AQSh-tyń Kongresi men Senaty detýtattarynyń aralyq saılaýynda joǵary palatada respýblıkandyqtar jeńiske jetkenimen, tómengi palatada demokrattardyń jeńiske jetip otyrǵandaryn eskersek, óz elinde ǵana emes, xalyqaralyq qaýymdastyq aldynda da saıası abyroıyn saqtap qalýǵa úlken áser etetin Sı Szınmen ótkizetin kelissózder prezıdent D.Tramp úshin óte mańyzdy bolmaq.
«Eshqandaı eldiń ishki saıasatyna aralaspaımyz» degen pozısııany ustanatyn Qytaı úkimeti Tramp ákimshiliginiń saýda jáne jańa texnologııalar salasyndaǵy saıasatyna ekonomıkalyq jáne naryqtyq qaǵıdalar arqyly qysym kórsetýge tyrysyp baǵatyny anyq.
Shanxaıda ótip jatqan álemdik deńgeıdegi kórmeniń ashylýyna AQSh-tyń bastaýymen batys elderiniń memleket basshylary qatysýdan bas tartqanymen, júzdegen batystyq kásiporyndardyń, olardyń arasynda ásirese amerıkandyq iri kompanııalardyń kóptep qatysýy aldaǵy bıik deńgeıdegi kelissózderdiń basym bóligi ekonomıka men bıznestiń múddesine qatysty máselelerge arnalatynyn anyqtap otyrǵandaı.
Osy jylǵy eń mańyzdy xalyqaralyq shara retinde Qytaı úkimeti kóp kúsh salǵan Shanxaıdaǵy iri saýda-ekonomıkalyq taqyryptaǵy kórmeniń xalyqaralyq arenadaǵy saıası-dıplomatııalyq mańyzy da az emes.
Batyrxan QURMANSEIIT,
shyǵystanýshy
Arnaıy «Egemen Qazaqstan» úshin
