Jańaózen mektep-gımnazııasynyń bazasynda ótkizilgen tájirıbe bólisý sharasyna qaladaǵy 24 mekteptiń ustazdary men basshylyǵy, mektep koordınatorlary, kitaphanashylary qatysty. Zııatkerlik mekteptiń ustazdary oqýshylarǵa kásibı baǵdar berý, saralap oqytý ádisteri, balanyń tulǵalyq ósýi men tárbıeleý, krıterıaldy baǵalaý, kitap oqýǵa baýlý jáne t.b týrasynda atqarǵan jumystarymen bólisti.
Kezdesý plenarly otyrystan bastaldy. Zııatkerlik mektep dırektory E.Paızov sóz alyp, zııatkerlik mekteptiń tájirıbesin ózge mektepterge taratý jumystary týraly tolyq maǵlumat berdi. Sondaı-aq, Jańaózen mektep-gımnazııasy men №22, 23 jalpy bilim berý mektepteriniń kitaphanasyna «Bookcrossing» sharasy aıasynda kitaptar syılady. Keıin Pedagogıkalyq sheberlik ortalyǵynyń dırektory Q.Boranbaeva muǵalimderdiń sheberligin shyńdaýǵa qatysty atqarylǵan jumystar jaıly baıandap, zalda jańartylǵan bilim berý baǵdarlamasyna kóshýde týyndaǵan saýaldarǵa jaýap berdi.
Semınar alty seksııa boıynsha jumys istedi. Mektep dırektorlarynyń basyn qosqan «Ujymdy basqarý: kóshbasshylyq jáne komandalyq jumys» seksııasynda kásiptik baǵdar berý jumystary boıynsha keńesshi S.Aldabergenova kásibı baǵdar jumystaryn uıymdastyrý týraly aıtsa, zııatkerlik mektep dırektory E.Paızov bilim ordasynyń mıssııasyn, uranyn, ustanymyn anyqtaý mańyzdylyǵy jáne jahandyq azamattyq túsinigin engizý týraly baıandap, bilim ordasynda bul turǵyda atqarylǵan jumystardy kórsetti.
-Búgingi semınarda maǵan jańalyq bolǵan Nazarbaev Zııatkerlik mektebiniń oqýshyǵa kásiptik baǵdar berý jumysy. Bul maǵan óte unady jáne men aldaǵy ýaqytta óz mektebime engizemin degen sheshim qabyldadym. Zııatkerlik mekteptiń kásiptik baǵdar berý jumysy boıynsha keńesshisimen tyǵyz baılanysta jumys jasaımyn degen úmittemin, deıdi Jańaózendegi №19 mekteptiń dırektory K.Júgenbaeva.
«Muǵalimniń kásibı damýy – sapaly bilim negizi» seksııasynda qazaq tili páni muǵalimi J.Maýytova men mektep dırektorynyń ǵylymı-ádistemelik jumystar jónindegi orynbasary B.Jaqsylyqova Jańaózendegi mektep dırektorynyń ǵylymı-ádistemelik, ınnovasııalyq jumystar jónindegi orynbasarlaryna muǵalim kóshbasshylyǵy arqyly muǵalimniń kásibı damýyna yqpal etý joldarymen bólisti. Al jahandyq perspektıvalar men jobalyq jumys páni muǵalimi G.Súıindikova ustazdar arasynda ózektiligin joımaǵan is-árekettegi jáne sabaqty zertteý tájirıbesi men ádis-tásilderi jaıly aıtty.
Bıylǵy jyldyń 25-26 qazan kúnderi Astana qalasynda ótken H «Jańa dáýirdiń mektebi» ǵylymı-tájirıbelik konferensııasynda álemniń 24 elinen jınalǵan bilim sarapshylary balany tárbıeleý jumystary jaıynda másele kóterip ony mektepte júıeleý týraly, balany mektep aıasynda tárbıeleý ózektiligin joımaǵanyn aıtqan edi. Bul turǵyda zııatkerlik mekteptiń tárbıe berý jumystary ózge mektepterge úlgi retinde taratylýda. Máselen, mektep dırektorynyń tárbıe jumystary jónindegi orynbasary A.Ihsanova men mektep kýratorlary «Máńgilik el» ulttyq ıdeıasy men «Rýhanı jańǵyrý» baǵdarlamasyn júzege asyrý arqyly mekteptegi tárbıe jumysyn uıymdastyrý» seksııasynda bala jáne ata-anamen jumys týraly aıtyp, ata-anany mekteppen birge jumys isteýge bet burǵyzý ádisteri jaıly aıtty. Balaǵa bilim berýdegi mańyzyn joımaǵan taǵy bir másele – oqýshyny kitap oqýǵa mektep qabyrǵasynda baýlý. Semınarda buǵan qatysty «Oqýshylarda kitap oqý mádenıetin qalyptastyrýdyń belsendi ádisteri» seksııasy uıymdastyryldy. Mektep kitaphanashysy J.Bahıtova balaǵa «kitap djemi» jáne ertegiler men shyǵarma negizinde «3D kitap jasaýdy» 20-dan asa kitaphanashyǵa kórsetti, birigip kitap jasady. Kitaphanashylar mundaı sharalardyń balalardy kitap oqýǵa rasymen baýlıtyndyǵyn aıtyp, pikirlerimen bólisti.
Dırektordyń beıindi-eksperımentaldyq jumystar boıynsha orynbasary Y. Imambaevanyń jetekshiligimen «Krıterıaldy baǵalaý júıesin engizý prosesin basqarý» seksııasy ótti. Mektep koordınatorlaryna pedagogıkalyq sheberlik ortalyǵynyń trenerleri jańartylǵan bilim mazmuny jaǵdaıynda oqýshylardy jıyntyq baǵalaýdyń erekshelikteri týraly baıandady.
Kóptegen pán muǵalimderine qyzyqty bolǵan seksııa - «Jańartylǵan bilim mazmuny boıynsha oqytý erekshelikteri». Bul seksııa boıynsha 200-den asa ustaz zııatkerlik mekteptegi pán muǵalimderine jańa bilim mazmunyna qatysty qyzyqty ádis-tásilderdi estidi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
