Wpost (polshalyq aptalyq) jýrnalısi, Polsha Reporterlar Qory basshysynyń orynbasary Anna Gılevska (Polsha) jáne FactCheck.kz qazaq redaksııasynyń bas redaktory Dýman Smaqov ózderiniń feıktarmen kúres tájirıbesimen bólisip, aqparatty jarııalar aldynda ony tekserýdiń qanshalyqty mańyzdy ekendigin túsindirdi.
Trenıng aıasynda faktchekıngtiń quraldary men ádisnamalary, jańalyqty daıyndaý barysynda aqparattyń túpderegi men sıfrly tehnologııany tekserý, tekserilgen aqparatty vızýaldaý, halyqaralyq jańalyqtardy taratý men aqparattyń túpderegin ártaraptandyrý syndy suraqtarǵa jaýap berildi. Trenıng-konsýltasııalar aǵylshyn jáne qazaq tilderinde boldy.
2 jyldyq joba aıasynda mundaı trenıng-konsýltasııalarǵa 100-den asa jýrnalıst qatysty. Almatyda «7 kún» jáne «Jas órken» redaksııalarynda qazaq tilinde jáne Kýrsıv.kz, Holanews.kz, Sputnik, Tengrinews, Zakon.kz, Informbıýro redaksııalarynda orys tilinde dál osyndaı trenıngter ótti.
Keńesten bólek, halyqaralyq (Ulybrıtanııa, Nıderlandy, Grýzııa, Polsha) jáne Factcheck.kz (Qazaqstan) trenerleri faktchekıng jáne halyqaralyq jańalyqtardy taratý boıynsha jýrnalısterge, stýdentterge jáne JOO oqytýshylaryna eki-úsh kúndik trenıngter men master-klasstar ótkizip turady. Qazirgi kúnge deıin 300-ge jýyq qatysýshy faktchekıng týraly jalpylama málimet aldy.
Trenıngter Qazaqstandaǵy «MediaNet Halyqaralyq jýrnalıstıka ortalyǵy» men Albany Associates International jáne IREX Europe birlese otyryp júzege asyryp otyrǵan aımaqtyq joba aıasynda uıymdastyryldy.
Orta Azııa jýrnalıstıkasyndaǵy jańalyqtardyń sapasyn jáne BAQ-tyń saýattylyǵyn arttyrý maqsatynda júzege asyp jatqan jobaǵa Astanadaǵy Ulybrıtanııa elshiligi qoldaý kórsetedi.
