Elbasy tapsyrmalaryn oryndaýǵa baǵyttalǵan
Densaýlyq saqtaý máselesine qatysty zań jobasy medısınalyq uıymdarda korporatıvtik basqarý júıesin jetildirý, donor jáne transplantasııalaý ınstıtýtyn damytý, medısınalyq bilim berý júıesin damytý jáne medısına kadrlaryn daıarlaý sapasyn arttyrýǵa baǵyttalǵan. Sonymen qatar onda mindetti áleýmettik medısınalyq saqtandyrý júıesin odan ári jetildirý men tegin medısınalyq kómektiń kepildik berilgen kóleminiń jańa modelin engizý qarastyrylǵan.
Atalǵan zań jobasy boıynsha baıandama jasaǵan Densaýlyq saqtaý mınıstri Eljan Birtanov depýtattar talqysyna usynylǵan qujatqa engizilgen ózgertýler arqyly memleket mindettemeleriniń naqty shegi aıqyndalatyndyǵyn, medısına qyzmetkerleriniń tólemaqy deńgeıi men mamandardyń básekege qabilettiligi ósetindigin, halyqqa kórsetiletin medısınalyq kómektiń qoljetimdiligi men sapasy artatyndyǵyn, densaýlyq saqtaý júıesin qarjylandyrý kólemin arttyrý nátıjesinde halyqtyń «qalta» shyǵystarynyń tómendeıtindigin, medısınalyq uıymdar naryǵynyń ashyqtyǵy artyp, naryqqa qatysýshy uıymdardyń arasyndaǵy básekelestik kúsheıetindigin atap ótti.
– Sondaı-aq zań jobasy donorlyq ınstıtýtty, týberkýlezben aýyratyn naýqastarǵa medısınalyq kómek kórsetýdi, mindetti áleýmettik medısınalyq saqtandyrý júıesin odan ári jetildirýge jáne ulttyq densaýlyq saqtaý shottary júıesin engizýge, keıbir ákimshilik jáne qylmystyq quqyq buzýshylyqtardyń quramyn qaıta qaraýǵa, sonymen qatar densaýlyq saqtaý júıesi máseleleri boıynsha qoldanystaǵy zańnamadaǵy kemshilikterdi joıýǵa baǵyttalǵan, – dedi Densaýlyq saqtaý mınıstri.
О́z kezeginde Májilis Tóraǵasy Nurlan Nyǵmatýlın densaýlyq saqtaý týraly zań jobasy Memleket basshysynyń kepildendirilgen medısınalyq kómektiń jańa modelin engizý týraly tapsyrmalaryn oryndaýǵa baǵyttalǵanyn atap ótti.
Palata Tóraǵasy atalǵan qujat azamattarǵa medısınalyq qyzmetterdiń qoljetimdiligin arttyrýdy ǵana emes, aqyly medısınalyq qyzmetterge memlekettik shyǵyndardy qysqartýdy kózdeıtinine toqtaldy. Bul zań jobasy medısınalyq uıymdarda korporatıvtik basqarý júıesin jetildirý, donor jáne transplantasııalaý ınstıtýtyn damytý, medısınalyq bilim berý júıesin jetildirý jáne medısına kadrlaryn daıarlaý sapasyn arttyrýǵa arnalǵan.
Sonymen qatar mindetti áleýmettik medısınalyq saqtandyrý júıesin odan ári jetildirý men tegin medısınalyq kómektiń kepildik berilgen kóleminiń jańa modelin engizý qarastyrylǵan.
Atap aıtqanda, donorlardy aqyly negizde tartyp, zań jobasynda naýqasqa beriletin dárilik zattarǵa qosymsha aqy tóleý tetikteri engizilgen. Májilis Tóraǵasy osy normalardyń qajettigi týraly kelise otyryp, sybaılas jemqorlyq pen quqyq buzýshylyqtar qaýpin boldyrmaý úshin tóleýdiń aıqyn tártibin retteıtin barlyq erejelerge naqty jáne túsinikti túzetýler engizýdiń mańyzdylyǵyn atap ótti.
Bekitilgen erejeler týraly aqparat medısınalyq mekemelerde, ınternet-resýrstarda ornalastyrylyp, jurtshylyq úshin qoljetimdi bolýyna nazar aýdarǵan Májilis Tóraǵasy, aıtylǵan pikirlerdi ekinshi oqylymǵa deıin eskerýdi usyndy.
Indýstrııalyq aımaqtarǵa jer bólý tártibi jeńildeıdi
Sonymen qatar jalpy otyrysta «Arnaıy ekonomıkalyq jáne ındýstrııalyq aımaqtar týraly» zań jobasy ilespe túzetýlerimen birinshi oqylymda maquldandy.
Zań jobasy boıynsha baıandama jasaǵan Investısııalar jáne damý mınıstri Jeńis Qasymbektiń aıtýynsha, basqarýshy kompanııalardan Arnaıy ekonomıkalyq aımaqtar men Indýstrııalyq aımaq qatysýshylaryna jer ýchaskelerin usynýdyń jańa mehanızmi engizilmek.
– Búginde qoldanystaǵy zańnama normalaryna sáıkes jer ýchaskesin alý prosesi kúrdeli. Oǵan shamamen 6-9 aı ýaqyt ketedi. Sonyń saldarynan jobalardy iske qosý merzimi sozylady. Investorlar da ýaqyt joǵaltady. Sońynda materıaldyq shyǵynǵa ushyraıdy. Budan bólek, qazirgi «Qazaqstan Respýblıkasyndaǵy arnaıy ekonomıkalyq aımaqtar týraly» Zańda jáne Jer kodeksinde qarastyrylǵan jer qatynastaryn reglamentteý qıyn jáne zańnamalyq aktiler arasyndaǵy ersili-qarsyly silteme normalarymen sıpattalady. Osyǵan baılanysty, zań jobasy qatysýshylardyń qysqa merzimde jáne jeńil prosedýralar arqyly jer ýchaskelerin alý tártibin ońtaılandyrýǵa baǵyttalǵan, – dedi J.Qasymbek.
Atap aıtqanda, Arnaıy ekonomıkalyq aımaq qurylatyn memleket menshigindegi jer ýchaskeleri Qazaqstan Respýblıkasynyń jer zańnamasyna sáıkes basqarýshy kompanııalarǵa qaıtarymdy negizde ýaqytsha paıdalanýǵa beriletin bolady. Al jekemenshiktegi jer ýchaskeleri ýaqytsha paıdalaný kelisimshartyna sáıkes beriledi.
О́z kezeginde, basqarýshy kompanııalar bul ýchaskelerdi ózderi segmenttep, Arnaıy ekonomıkalyq aımaq qatysýshylaryna usynady.
Mınıstrdiń baıandaýynsha, zań jobasyn qabyldaý Arnaıy ekonomıkalyq aımaqtar men Indýstrııalyq aımaqtardyń jumysyn jandandyrýǵa, 2022 jylǵa deıin qosymsha 10 myń jumys ornyn ashýǵa jáne 150-den astam jańa jobalardy iske qosýǵa múmkindik bermek.
Depýtattar zań jobasymen jumys isteýi barysynda «Innovasııalyq tehnologııalar parki» arnaıy ekonomıkalyq aımaǵyn respýblıkalyq mańyzy bar Almaty qalasynyń jergilikti atqarýshy organynyń basqarýyna berý jónindegi naqtylaýshy normalardy engizýdi, elordanyń jergilikti atqarýshy organynyń «Astana – jańa qala» arnaıy ekonomıkalyq aımaǵyn basqarý bóligindegi quzyretin alyp tastaý jónindegi normalardy naqtylaýdy, «Qorǵas» shekara mańy yntymaqtastyǵy halyqaralyq ortalyǵy» arnaıy ekonomıkalyq aımaǵynyń jumys isteý erekshelikterin osy ortalyqtyń arnaıy ekonomıkalyq aımaq mártebesin alýyna baılanysty zańnamalyq deńgeıde bekitýdi, ýákiletti organnyń Úkimetke arnaıy ekonomıkalyq aımaqty qurý, onyń jumys isteý merzimin uzartý nemese taratý týraly usynystar engizý jónindegi quzyretin keńeıtý sııaqty jáne basqa da túzetýler engizgen.
О́ndiriske alyndy
Otyrys barysynda Májilis «Qazaqstan Respýblıkasynyń keıbir zańnamalyq aktilerine bıznes-ortany damytý jáne saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn, Qazaqstan men Qytaı Halyq Respýblıkasynyń úkimetteri arasyndaǵy QHR-dyń jeńildikti kredıt berýi týraly negizdemelik kelisimdi ratıfıkasııalaý týraly jáne Qazaqstan men Reseı Federasııasynyń úkimetteri arasyndaǵy M.V.Lomonosov atyndaǵy Máskeý memlekettik ýnıversıtetiniń qazaqstandyq fılıalynyń jumys isteýi týraly kelisimdi ratıfıkasııalaý týraly zań jobalaryn jumysqa aldy.
Jalpy otyrys sońynda depýtattar G.Bıjanova, J.Nurmanbetova, M.Temirjanov, T.Iаkovleva, B.Jylqyshıev, M.Qazbekova, E.Barlybaev, A.Perýashev, I.Smırnova, V.Kosarev, Sh.Hahazov, R.Kım depýtattyq saýaldar joldady.
Serik ÁBDIBEK,
«Egemen Qazaqstan»
