HHI ǵasyrdyń adamy úshin ýaqyt – eń qymbat qazyna. Al ýaqytty tıimdi paıdalaný eń kerekti, eń paıdaly ónerge aınalyp otyr. Densaýlyq saqtaý júıesinde aqparattyq tehnologııany, mobıldi sıfrly qosymshalardy belsendi paıdalaný, elektrondy densaýlyq tólqujatyn engizý jáne «qaǵazsyz» aýrýhanalarǵa kóshý arqyly medısınalyq kómektiń qoljetimdiligi men tıimdiligin arttyrý – Memleket basshysynyń jyl basyndaǵy Joldaýynda arnaıy aıtylǵan másele bolatyn. Iаǵnı memlekettik dárejede kóńil bólinip otyrǵan bastama degen sóz.
Batys Qazaqstan oblysy medısınalyq qujattardy qaǵazsyz júrgizýge engizý qanatqaqty rejimde 2018 jyldyń qańtarynan bastaldy. Joba sheńberinde óńirdegi medısına uıymdarynda «Kazmedinform» medısınalyq aqparattyq júıesi, Oral qalasyndaǵy 6 emhanada elektrondy kezekti basqarý júıesi, jedel medısınalyq járdemdi basqarýdyń «ADIS» avtomattandyrylǵan júıesi engizildi.
Mobıldik qosymsha arqyly dárigerlerdiń jumys kestesimen tanysýǵa, turǵylyqty jeri boıynsha tirkelgen ýchaskeni anyqtaýǵa, dáriger kartochkasyn qaraýǵa, oblystyń medısınalyq uıymdaryn qaraýǵa jáne olardy kartadan tabýǵa, dárigerdi úıge shaqyrýǵa, dárigerdiń qabyldaýyna jazylýǵa jáne qajet bolǵan jaǵdaıda jazylý ýaqytyn ózgertýge bolady. Oǵan qosa Push habarlamalar jáne dárigerge barý jóninde eskertý fýnksııalary bar.
Dárigerdiń qabyldaýyna jazylýǵa arnalǵan k-vrachu.kz veb-portalynda tirkelgen ýchaskeni izdeýge, dárigerdiń (jalpy, tájirıbelik dáriger) qyzmet kórsetetin aýdanyn qaraýǵa, dárigerdi úıge shaqyrýǵa, dárigerdiń qabyldaýyna onlaın jazylýǵa, dárigerdiń kestesin, onyń biliktiligin qaraýǵa, dárigerdi baǵalaýǵa bolady.
Medısınalyq-sanıtarııalyq alǵashqy kómek uıymdarynda kezekti azaıtý úshin qalanyń barlyq emhanasynda «Elektrondy tablo» elektrondy kezekti basqarý baǵdarlamasy engizilgen. Qalanyń 6 emhanasynda jáne «Derkól» dárigerlik ambýlatorııasynda «Kazmedınform» medısınalyq aqparattyq júıesimen ıntegrasııalandyrylǵan elektrondy kezekti basqarý júıesi jumys istep tur.
Qazirgi tańda óńirdegi 121 nysannyń 105-i qaǵazsyz qyzmet kórsetýge kóshirilgen.
Oblystyq jedel medısınalyq járdem qyzmeti onlaın rejiminde jumys isteýi úshin sıtýasııalyq ortalyq ornatylyp, avtomattandyrylǵan júıe jańǵyrtyldy. Qalalyq jedel járdem stansasy 32 dana mobıldik ARM planshettermen 100% qamtylǵan. Al oblys boıynsha 138 dana sanıtarlyq avtokólik túgelimen GPS-monıtorıngke qosylǵan.
Taǵy da sandardy sóıletsek, óńirdegi medısınalyq uıymdar kompıýterlik tehnıkamen 100% jaraqtalǵan, bul degenińiz − 4500-deı kompıýter! Qaı salaǵa da aýadaı qajetti quralǵa aınalǵan bul tehnıkany jańartyp otyrýǵa oblys basshylyǵy jyl saıyn kóńil bólip keledi. Tipti «Batys Qazaqstan oblysynda densaýlyq saqtaý basqarmasyn sıfrlandyrý jónindegi jol kartasy» atty arnaıy baǵdarlama ázirlenip, onyń oryndalýyn oblys ákiminiń orynbasary qadaǵalaıdy.
Árıne problema da joq emes. Sonyń biri – ortalyqtan shalǵaı eldi mekenderdiń ınternetpen tolyq qamtylmaýy. Búginde 383 medısınalyq mekemeniń 120-sy ınternet jelisine qosyla almaı otyr. Bular negizinen alystaǵy shekaralas aýdandardyń medısınalyq, feldsherlik-akýsherlik pýnktteri. Taıaýda óńirde bolǵan Aqparat jáne kommýnıkasııalar vıse-mınıstri Nurgúl Maýberlınova shekaralyq eldi mekenderdi sapaly baılanys, ınternet júıesimen qamtamasyz etý máselesin sheshý úshin respýblıkalyq deńgeıde jumys atqarylyp jatqanyn aıtqan bolatyn. Endeshe keshikpeı bul túıtkildiń de túıini tarqatylar.
– Oral qalalyq №3 emhanasy bir kezekte 100 naýqasty qabyldaýǵa arnalǵanymen, tolyq qýaty 320 pasıentti birden qabyldaýǵa jetedi, – deıdi emhana dırektory Sandýǵash Keńesova. – Oblys ortalyǵynyń tarıhı aýmaǵynda ornalasqan mekeme 46 500 adamǵa qyzmet kórsetedi.
Bir ereksheligi osy aýmaqta 11 mektep, 10 balabaqsha, 4 kolledj, bir memlekettik ýnıversıtet ornalasqan. Sonda bul emhanaǵa balabaqshanyń 1639 tárbıelenýshisi, 6837 oqýshy, 8212 stýdent qaralady. Emhanada qyzmet etetin 305 dárigerdiń ıyǵyndaǵy jaýapkershilik júgin baǵamdaı berińiz.
О́ńirdegi barlyq medısınalyq mekeme sııaqty №3 emhana da jyl basynan bastap qaǵazsyz qujat júrgizýge kóshken. Bul úshin barlyq jaǵdaı jasalǵan. Dárigerler de, naýqastar da densaýlyq saqtaý salasyna jańa júıeniń, aqparattyq tehnologııanyń enýin qýana quptap otyr.
Qazbek QUTTYMURATULY,
«Egemen Qazaqstan»
Batys Qazaqstan oblysy
