«Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda Memleket basshysy qolaıly ómir súrý ortasyn týdyrý úshin sapaly ári qoljetimdi turǵyn úıdiń bolýyn negizgi faktorlardyń biri retinde atady.
Nysandy aralaý kezinde Premer-Mınıstr B. Saǵyntaevqa jańa yqsham aýdanda bıyl 10 úıdiń (800 páter) qurylysyn aıaqtaý josparlanǵany týraly baıandady. Turǵyn úıler Prezıdenttiń «Bes áleýmettik bastama» úndeýinde aıtylǵan «7–20–25» baǵdarlamasy boıynsha satylatyn bolady. Budan ózge, turǵyn úı alabynda jeke qurylysy salýshylar 205 tıptik jeke turǵyn úıler salyp jatyr, olardyń qurylysy da jyl sońyna deıin aıaqtalady.
Turǵyn úıdiń qoljetimdiligi men sapasyn arttyrý maqsatynda 2018 jyly óńirde «Nurly jer» baǵdarlamasy boıynsha 32 turǵyn úı men 37 ınjenerlik ınfraqurylym jobasyn salý úshin barlyǵy 13 mlrd teńge bólingen. Onyń ıgerilýi qazir 96% qurap otyr. Nátıjesinde 10 aıda 448,3 myń m² turǵyn úı tapsyryldy, bul ótken jyldyń kórsetkishinen 8,4%-ǵa joǵary.
Oblys ákiminiń orynbasary E. Daýylbaev sonymen qatar Memleket basshysynyń tapsyrmasy boıynsha oblys ákimdigi jergilikti bıýdjetten bastapqy jarnanyń 10% sýbsıdııalaý tetigin engizgenin habarlady. Jalpy, baǵdarlama bıyl oblysta úı kezeginde turǵyndardyń 30% qamtamasyz etýge múmkindik beredi.
Eske salaıyq, elimiz boıynsha «Nurly jer» baǵdarlamasy aıasynda bıylǵy jyldyń 9 aıynda 8,8 mln m² turǵyn úı paıdalanýǵa berildi, bul 2017 jyldyń osyndaı kezeńimen salystyrǵanda 11,6%-ǵa artyq. 77 myńnan astam otbasy óz baspana jaǵdaılaryn jaqsartty, onyń ishinde 9,5 myń otbasy memleket qarajaty esebinen salynǵan turǵyn úıge ıe boldy. QR Investısııalar jáne damý mınıstrliginiń málimetinshe, bıyl barlyǵy 12,1 mln m² kem emes turǵyn úıdi paıdalanýǵa berý josparlanǵan, onyń ishinde memlekettik ınvestısııalar aıasynda 1,3 mln m² nemese 22 myń páter berilmek.
