Sıfrlandyrý keńsesiniń basshysy D. Egizbaevtyń aıtýynsha, «Sıfrly Qazaqstan» memlekettik baǵdarlamasy aıasynda Jambyl oblysynda «Smart-Taraz» jobasy iske asyrylyp jatyr. Oǵan negizgi bes baǵyt boıynsha: bilim berý, densaýlyq saqtaý, turǵyn úı-kommýnaldyq sharýashylyq, kólik, agroónerkásiptik keshen jáne qaýipsizdik boıynsha 20 joba kiredi.
Densaýlyq saqtaý salasynda oblys halqynyń 70%-ynda elektrondy densaýlyq pasporty bolady. Tipti, búgingi kúnniń ózinde Taraz qalasynyń 34 myń turǵyny medısınalyq qyzmet alý úshin arnaıy qosymshany qoldanady. Kelesi jylǵa qaraı paıdalanýshylar sany 200 myńǵa jetpek.
Bilim berý júıesinde kompıýterlermen jabdyqtalǵan synyptar sany osy jyldyń 10 aıynda 22%-dan 58,5%-ǵa deıin ósti. Jyl sońyna deıin 100% qamtý josparlanyp otyr. Júzege asqan jobalar arasynda «Balalardy birinshi synypqa jáne mektepke deıingi mekemelerge qabyldaý qyzmetterin avtomattandyrý» jobasy bar, al kelesi jyly mektep synyptary úshin robottardy shyǵarý jobasy iske qosylmaq. Aýyldyq kitaphanalar bazasynda 24 sıfrlyq synyp ashyldy, jyl sońynda mundaı ortalyqtardyń sany 57-ge deıin kóbeımek. 2019 jyldyń sońyna qaraı sıfrly synyptar 250 myńnan astam turǵyny bar barlyq eldi mekenderde jumys isteıtin bolady.
Kólik salasynda biryńǵaı dıspetcherlik ortalyq pen avtobýs baǵdarlaryna arnalǵan mobıldi qosymsha engizildi. Kelesi jyly elektrondyq avtobýs bıletteri iske qosylady.
Turǵyn úı-kommýnaldyq sharýashylyǵyn sıfrlandyrý turǵysynda bıyl óńirde qalalyq sýmen jabdyqtaý júıesi avtomattandyrylǵan. Jyl sońyna deıin «aqyldy oram» jobasy bastaý alyp, 315 kóppáterli turǵyn úı «e-Shańyraq» biryńǵaı aqparattyq júıesine qosylady. Keler jyly kommýnaldyq qyzmetter tólemi úshin biryńǵaı esep aıyrysý ortalyǵyn engizý josparda bar.
Bıyl AО́K-te jaıylymdar 100%-ǵa sıfrlandyrýdan ótedi. Sondaı-aq, oblysta Talas ózeniniń boıynda sý resýrstaryn baqylaý jáne bólý jónindegi ortalyq ashylǵan. 4 ferma aqyldy tehnologııalar ıgiligin kórip júr. Bolashaqta ákimdik 20 fermany tolyq sıfrlandyrmaq nıette, al 316-na bilim taratý ortalyqtarynyń negizinde sıfrlandyrý elementterin engizbek.
Premer-Mınıstrge aýyldyq jerlerde «sıfrlyq synyptar» jumys isteıtini týraly baıandaldy. Ortalyq mamandary turǵyndarǵa elektrondy úkimet anyqtamalaryn alyp berýge kómektesedi. Al, jyl sońyna deıin aqparattyq derekqorlardy biriktirý arqasynda olar barlyq memlekettik baǵdarlamalar boıynsha tolyq keńes berý múmkindigine ıe bolady. Qazirgi tańda 32 synyp jumys isteıdi, jyl sońyna deıin taǵy 34-i iske qosylady. 2019 jyly qosymsha 209 synyp ashylmaq. Qabyldanǵan sharalar osy jyldyń mamyr–qyrkúıek aılarynda 182 myń adamnyń sıfrlyq saýattylyǵyn arttyrýǵa múmkindik berdi. Jalpy kórsetkish 61%-dan 78,5%-ǵa deıin ósti.
Búginde Jambyl oblysy turǵyndarynyń 99%-y ınternetpen qamtylǵan, bul — 378 eldi mekenniń 347-inde ınternet bar degen sóz. Bıyl jáne kelesi jyly ınternet jyldamdyǵy 4 Mbıt/s-tan tómen eldi mekenderde jyldamdyqty arttyrý jumysy atqarylyp jatyr. 2020 jyly 250-den astam turǵyny bar eldi mekenniń bári ınternetke qosylady.
Jeltoqsannyń 1-inde Jambyl oblysynda Astana Hub AT-startaptar halyqaralyq tehnoparkine uqsas Taraz haby iske qosylady. Bul týraly joba jetekshisi T. Omarov habarlady. AT-ortalyq atalmysh sala mamandarynyń jańa býynyn ósirip, olarǵa robotty tehnıka jáne VEB-baǵdarlamalaýdy úıretýdi kózdeıdi.
«Ortalyq bazasynda 2019 jyldyń basynan bastap ınformatıka, robotty tehnıka jáne 3D modeldeý oqytýshylaryn oqytpaqpyz. “Sıfrlyq Qazaqstan” baǵdarlamasy arqasynda úsh bilim berý jobasyn júzege asyramyz. Birinshisi – balabaqshalardy avtomattandyrýdy kózdeıtin “aqyldy balabaqsha” jobasy. Onyń arqasynda Jambyl oblysynyń barlyq mektepke deıingi uıymdary 100%-ǵa (508 uıym) tegin avtomattandyrylǵan. Ekinshi joba – “aqyldy mektep” dep atalady, birinshi synyp balalaryn mektepke qabyldaýǵa arnalǵan joba búgingi tańda 119 mektepke engizildi. Qalǵan 326 mektep 15 jeltoqsanǵa deıin avtomattandyrylady. Úshinshisi – “aqyldy kolledj” jobasy, ol arqyly Jambyl oblysynyń barlyq kolledjderi avtomattandyrylady», — dedi T. Omarov.
Premer-Mınıstr Baqytjan Saǵyntaev, sıfrlandyrý salasyndaǵy jobalardy iske asyrý kezinde aımaqtyń ekonomıkalyq tıimdiligin eskerýdiń mańyzdy ekenin atap ótti.
Sıfrlandyrý barysymen is júzinde tanysý úshin AT-lıseıdiń Veb-baǵdarlamalaý jáne robotty tehnıka synyptary tanystyrylyp, onda Premer-Mınıstr óńirde bilim berý qyzmetteriniń sapasyn jaqsartý boıynsha qabyldanǵan sharalar týraly habardar boldy. Zamanaýı sıfrlyq tehnologııalar men baǵdarlamalar sıfrlyq ekonomıkaǵa qajetti daǵdylardy óskeleń urpaq boıyna sińirýge septigin tıgizedi.
Jambyl oblysy ákimdiginiń aqparaty boıynsha aqparattyq tehnologııalarǵa oqytý isi qalalyq ári aýdandyq mektepterde de júrgizilip keledi. Bıyl oblysta 120 robotty tehnıkalyq synyp ashylǵan. Oblystyń barlyq aýdan ortalyqtarynda, sondaı-aq Taraz qalasynda AT-synyptarda qosymsha sabaqtar oqytylady. Budan basqa, Taraz tehnıkalyq shyǵarmashylyq ortalyǵynda robot qurastyrý isimen 100-ge jýyq stýdent aınalysady.
