«Muǵalimniń kásibı quzyrettiligin qalyptastyrýdaǵy pedagogterdiń biliktiligin arttyrý júıesiniń róline» qatysty zamanýı talaptarǵa toqtalǵan Raısa Ajdarqyzy ustazdardyń biliktiligin kóterýdegi «О́rleýdiń» Almaty qalasy boıynsha jasalyp jatqan jumystaryna toqtaldy.
Mazmuny jańartylǵan bilim berý baǵdarlamasy boıynsha oqýshylardyń synı oılaý daǵdylaryn qalyptastyrýǵa, pánder boıynsha fýnksıonaldyq saýattylyǵy men joba jumystarynyń tıimdiligin arttyrýǵa baǵyttalǵan bilim berýdiń ınnovasııalyq tehnologııalaryn muǵalimderge oqytýda elimizdiń ár oblysynda ornalasqan «О́rleý» biliktilikti arttyrý ulttyq ortalyǵy» aksıonerlik qoǵamy fılıaldary Pedagogıkalyq qyzmetkerlerdiń biliktiligin arttyrý ınstıtýttarynyń professorlyq-oqytýshylyq quramy aıanbaı eńbek etýde.
Solardyń qatarynda «О́rleý» biliktilikti arttyrý ulttyq ortalyǵy» aksıonerlik qoǵamynyń fılıaly Almaty qalasy boıynsha Pedagogıkalyq qyzmetkerlerdiń biliktiligin arttyrý ınstıtýty otandyq jáne sheteldik ozyq ádistermen birge ózimizdiń qala muǵalimderiniń úzdik kásibı ıdeıalaryn iske asyrýda tıimdi, sátti bilim berý aıasyn qalyptastyrý baǵytynda qyzmet jasaıdy.
Bilim berý júıesiniń barlyq deńgeıindegi muǵalimder úshin bilimdik qyzmet kórsetedi. qysqamerzimdi kýrstar, sonymen qatar mazmuny jańartylǵan bilim berý baǵdarlamasy sheńberinde: jańǵyrtylǵan deńgeılik kýrstar; aǵylshyn tilin oqytý boıynsha pándik-tildik kýrstar; robototehnıka boıynsha kýrstar; kúndizgi-qashyqtyqtan oqytý rejımindegi kýrstar; ınklıýzıvti bilim berýge muǵlimderdi daıarlaý. Barlyq kýrstar memlekettik tapsyrys negizinde júrgiziledi.
2017 jyldyń jospary boıynsha, Instıtýtta ótken 120 Biliktilikti arttyrý kýrstarynda 3642 pedagog kásibı biliktiligin shyńdady. 2018 jyldyń birinshi jartysynda Almaty qalasynyń 2475 muǵalimi kýrsta oqydy.
Memlekettik tapsyrys boıynsha úshinshi jyl qatarynan mazmuny jańartylǵan bilim berý baǵdarlamasy boıynsha pedagogterdiń biliktiligin arttyrý kýrstary ótkizilýde. Máselen, 2017 jyly ótkizilgen 80 kýrsta 2652 muǵalim biliktiligin arttyrdy. Sonymen qatar qosymsha kontıngent úshin 7 kýrsta 210 muǵalim oqytyldy. 2018 jyly mazmuny jańartylǵan orta bilim berý sheńberinde uıymdastyrylǵan 81 kýrstan 2241 muǵalim ótken. Alaıda olardyń 23-i sertıfıkat almaǵan. 2016-2018 jyldar aralyǵynda jalpy sany 41 tyńdaýshy sertıfıkattalmaǵan.
Inklıýzıvti bilim berý boıynsha muǵalimderdi daıarlaý isi qazirgi tańda ózekti másele bolyp tabylady. Erekshe jaǵdaıda oqytýdy qajet etetin balalardy jalpy bilim beretin mektep jaǵdaıyna beıimdeý, áleýmettendirý pedagogterdiń aıryqsha daıyndyǵy men arnaıybiliktiligin talap etedi. Osy máselelerdi sheshý maqsatynda 2017 jyly ınstıtýt jalpy bilim beretin mektep muǵalimderi úshin kýrstar ótkizdi. Instıtýtta birinshi ret ınklıýzıvti bilim berý boıynsha keńeıtilgen formatta – 160 saǵat kóleminde kýrs ótti. Memlekettik tapsyrys boıynsha bul kýrsta jalpy bilim beretin mektepterdiń 57 muǵalimi oqydy.
«О́rleý» BAUO» AQ baǵdarlamasynyń basqa kýrstardan artyqshylyǵy til men pándi yqpaldastyrý ádisimen (CLIL) oqytyp, TKT CLIL sertıfıkattarynyń berilýi. Osy baǵytta biliktilikti arttyrý ınstıtýty 2010 jyldan beri jumys jasaıdy, jáne naqty jetistikteri bar ekendigin aıtqanymyz oryndy. Bizdegi qysqa merzimdi kýrsta aǵylshyn tilin oqyǵan muǵalimder boıynsha CLIL ádistemesi boıynsha sabaqtaryn aǵylshyn tilinde ótkizýde. Kýrstan ótken muǵalimderge júıeli túrde kýrsaralyq qoldaý kórsetilip, keńester beriledi. Ádistemelik nusqaýlyqtar, jaratylystaný-matematıkalyq baǵyttaǵy pánder boıynsha glossarıı (sózdik), sabaqtyń qurylymy týraly fragmentter, vıdeo-sabaqtar www.almaty-pkso.kz saıtyna qoıyldy. Fılıaldyń feısbýktegi «О́rleý Almaty» paraqshasy da belsendi.
Elvıra Serikqyzy,
«Egemen Qazaqstan»
ALMATY
