Qazaqstan aýyr atletıkasynyń órleý kezeńi 2005 jyly bastalǵanyn jankúıerler jaqsy biledi. Naqty derekterge súıensek, 2005-2015 jyldar aralyǵynda álem chempıonatynyń jalaýy 9 márte jelbiredi. Sol básekelerdiń tek bireýinen ǵana júldesiz oraldyq. Ol – 2007 jyly Chıangmaıda ótken saıys. Al ózge jarystardyń barlyǵynda tamasha óner kórsetken otandastarymyz óz jankúıerlerin qýanysh pen shattyqqa bóledi. Máselen, 2009 jyly Goıang pen 2014 jyly Almatyda uıymdastyrylǵan dúbirli dodanyń komandalyq esebinde ekinshi oryndy oljaladyq. 2010 jyly Antalııada, 2011 jyly Parıjde jáne 2015 jyly Hıýstonda úshinshi tuǵyrǵa taban tiredik. 2005 jyly Dohada jáne 2006 jyly Santo-Domıngoda tórtinshi satyǵa jaıǵastyq. 2013 jyly Vroslavta jetinshi oryndy qanaǵat tuttyq.
Qazaqstannyń osyndaı deńgeıge jetýi biraz alpaýyt memleketter men túrli halyqaralyq uıymdardyń qytyǵyna tıse kerek, ilik izdegen olar sońymyzǵa sham alyp tústi. Aqyrynda «dopıng qoldandy» degen aıyppen talaı sańlaqtarymyzdy ataǵynan aıyryp, túrli merzimge úlken sporttan shettetti. Sonyń saldarynan ulttyq komandamyz 2017 jyly AQSh-tyń Anahaım qalasynda ótken álem chempıonatyna barmady.
Bir jylǵa sozylǵan úzilisten keıin qaıta qatarǵa qosyldyq. Ashǵabadta ótken jarysta tek qos legıoner – Arlı Chonteı men Nadejda Lıhacheva ǵana jeńis tuǵyryna kóterildi. Chonteıdiń – Qytaıdan, Lıhachevanyń Reseıden kelgenin sportsúıer qaýym jaqsy biledi. О́kinishtisi, ár jyldary Olımpııa oıyndary men álem chempıonattarynda atoı salǵan Zúlfııa Chınshanlo, Farhad Harkı, Nıjat Rahımov, Karına Gorıcheva, Denıs Ýlanov jáne Aleksandr Zaıchıkov syndy juldyzdarymyz jyldyń basty dodasynda qalyń toptyń arasynda qalyp qoıdy. О́z áriptesterimen birge Túrikmenstanǵa sapar shekken dańqty ziltemirshi Ilıa Ilın sońǵy sátte jarys jolyna shyǵýdan bas tartty. Taǵy bir aıta keterlik jaıt, qossaıystyń qorytyndysy boıynsha jeńis tuǵyryna kóterile almaǵan Karına Gorıcheva, Nıjat Rahımov jáne Raýshan Meshithanova jekelegen jattyǵýlarda júlde aldy. Ol da kóńilge medet.
Bıylǵy álem chempıonatynyń komandalyq saıysynda ádettegideı Qytaı quramasy jeke-dara kósh bastady. Bul joly Qytaı eliniń ókilderi 19 (7 altyn+8 kúmis+4 qola) júldege qol jetkizdi. Ekinshi orynda – Taıland. Olar 3 altyn men 3 qolany qorjynǵa saldy. Úshinshi satyǵa Iran taban tiredi. Parsy eliniń órenderi 2 altyn men 1 qolany ıelendi. Sondaı-aq Reseı (2+0+0), Soltústik Koreıa (1+3+0), Armenııa (1+1+0), Grýzııa (1+0+1), Taıpeı (1+0+0), Ispanııa (1+0+0) jáne Indonezııa (1+0+0) quramalary úzdik on komandanyń qataryna qosyldy.
Ǵalym SÚLEIMEN,
«Egemen Qazaqstan»
ALMATY
