Ataýly jyldyń belgilenýi jastar ómirine alańdaıtyn azamattar úshin jaqsy jańalyq boldy. Qýanta tura, bul usynys maǵan úmit pen kúdik syılady.Úmitim únemi «bizdiń bolashaǵymyz» degen ádemi tirkespen aıtylatyn jastarǵa da bir jyl arnalyp, jas býynnyń saıası-áleýmettik, materıaldyq, rýhanı ahýalyn jaqsartatyn mańyzdy baǵdarlamalar jasalatyn jyl bolady deıdi. Al, kúdigim bul joly qurǵaq urandardy kótergen fleshmobtar kóbeıip, «Jastar jyly» kóshedegi alaýlaǵan, jalaýlaǵan sharalarmen aıaqtalyp qalmasa eken deıdi.
Jastardyń aqparattyq tehnologııany jetik meńgerip, ozyq oıly maman, bilikti baǵdarlamashy ǵana emes, mańyzdy salalarda tyń jańalyqtar ashýyna yqpal etetin jobalarǵa kóńil bólingeni abzal. Qazaqta «Ne ekseń, sony orasyń» degen sóz bar, jastar kompıýter tilin jáne aǵylshyn tilin, ózge de shetel tilderin jetik meńgerse «Sıfrly Qazaqstan» syndy alyp mindetterdi aldyna qoıǵan elimizdiń shyn tiregi bolyp, aýqymdy isterdi óz qoldarymen qınalmaı júzege asyratyn bolady.
Ozyq oı, izgi ıdeıalarmen jaraqtalǵan, nátıjeli jumysqa negizdelgen jobalar respýblıkalyq deńgeıde qoldanysqa ıe bolsa degen oı bar.
Jastar máselesine kóńil bólip, arnaıy jyl belgilegeni úshin Elbasymyz Nursultan Ábishulyna alǵysymyz sheksiz, endigi mindet Qazaqstan halqynyń moınynda, ol – memlekettik organdar men jastar saıasaty basqarmalary jastarmen birlesip atalmysh jyldy abyroımen ótkizýi jáne tek ótkizip qana qoımaı jastar ómirine oń áserin beretin nátıjeli isterge qol jetkizý.
Tımýr BEKTUR,
IT mamany, «Timur academy»
jobasynyń jetekshisi
Mańǵystaý oblysy
