Konferensııa jumysyna Mádenıet jáne sport mınıstri Arystanbek Muhamedıuly, Parlament depýtattary, elimizdegi jetekshi sarapshylar men ǵylymı qyzmetkerler qatysty. Jıyndy ashqan Arystanbek Muhamedıuly Elbasy bastamasymen júrgizilip jatqan «Sıfrly Qazaqstan» memlekettik baǵdarlamasy aıasynda «Elektrondy qujattardyń biryńǵaı arhıvi» aqparattyq júıesin qurý jáne engizý boıynsha atqarylyp jatqan jumystardyń aýqymdylyǵyna toqtaldy. «Memleket basshysy bıylǵy Joldaýynda sıfrlandyrýdy Qazaqstannyń Úshinshi jańǵyrýynyń arqaýy dep atap, sıfrly tehnologııaǵa kóshý týraly naqty nusqaýlar berdi.
Búginde Qazaqstan arhıv isin damytýdyń jańa kezeńine kóship otyr. Arhıvtik qujattardy sandyq jetkizgishterge aýdarý, ǵylymı-anyqtamalyq apparat pen arhıv qorlarynyń avtomattandyrylǵan derekqoryn qurý aqparat sapasyn joǵaltpaı uzaq ýaqyt saqtaýdy qamtamasyz etedi. Memlekettik organdarda «Elektrondy qujattar qoımasy» servıstik baǵdarlamalyq ónimi engizilip jatyr. Bul elektrondy qujattardyń úlken kólemin saqtaýǵa jáne basqarýǵa arnalǵan zamanaýı baǵdarlamalyq-apparattyq keshen», degen mınıstr arhıv salasynyń qyzmetkerlerin Qazaqstan Respýblıkasy «Ulttyq arhıv qory men arhıv týraly» Zańynyń qabyldanǵanyna jıyrma jyl tolýymen quttyqtady.
Ulttyq arhıv qoryndaǵy qujattardy jınaqtaý, tizimge alý, saqtaý jáne paıdalaný syndy arhıv qyzmetiniń negizgi baǵyttaryn atap ótken Ulttyq arhıv dırektory Jangeldi Mahashov elektrondy qujat aınalymyna tolyq kóshýdiń ońtaıly tustary týraly baıandady.
– Ulttyq arhıvte mádenı, saıası jáne óner qaıratkerlerine tıesili 6 myńǵa jýyq saqtaý birliginen turatyn jeke tektik qujattar saqtaýly. Sıfrly kóshirmeler qaǵaz túpnusqanyń uzaq ýaqyt saqtalýyna múmkindik berse, ekinshi jaǵynan qujattyq arhıv murasyn jappaı sıfrlandyrý kóptegen zertteýshilerge – jergilikti ólketanýshylarǵa, tarıhshylarǵa, jýrnalısterge jumys isteýge yńǵaıly. Jelilik tehnologııalar arqasynda qujat qoǵamǵa qoljetimdi bolady, – dedi arhıv dırektory.
Dırektordyń aıtýynsha, Mádenıet jáne sport mınıstrliginiń bastamasymen 2014 jyldan beri memlekettik organdarda qujattardy elektrondy qujattar qoımasyna kóshirý jumystary kezeń-kezeńimen atqarylyp keledi. Arhıv isi boıynsha alys jáne jaqyn shet memlekettermen 12 halyqaralyq kelisimshartqa, 3 memorandýmǵa qol jetkizilgen.
Halyqaralyq ǵylymı-tájirıbelik konferensııa sheńberinde arhıv mekemeleri qyzmetiniń basty baǵyttary boıynsha pikirtalas júrgizilip, saqtaý qorynan alynǵan tarıhı mańyzy zor memlekettik qujattardyń kórmesi ótti. Sondaı-aq Mádenıet jáne sport mınıstri Arystanbek Muhamedıuly 40-qa tarta úzdik qyzmetkerdi Qazaqstannyń arhıv salasynyń damýyna eleýli úles qosqany úshin marapattady.
Aıta keteıik, Qazaqstan Respýblıkasynyń Ulttyq arhıvi 11 jyldan beri Halyqaralyq Arhıvter Keńesiniń Eýroazııalyq óńirlik bólimshesiniń múshesi. Respýblıkada barlyǵy 219 memlekettik arhıvte 3 185 qyzmetker jumys atqarady. Bul arhıvterde 24 mıllıon saqtaý birlikteri bar. 760 kınoqujat, 4 957 birlik fotoqujat, 981 fonoqujat bar. Búginge deıin 39 340 saqtaý birlikteri sıfrlandyryldy.
Aıa О́MIRTAI,
«Egemen Qazaqstan»
