Forým aıasynda Almaty oblysyndaǵy týrızmdi damytý maqsatynda ashylǵan Zhetisu Travel ortalyǵynyń tusaýkeseri jasalyp, ulttyq taǵamdardyń «Toı qazan» VI festıvali de kelýshiler nazaryna usynyldy.
– Memleket basshysy jaqynda jarııalanǵan Joldaýynda syrttan keletin jáne ishki týrızmdi damytýǵa erekshe kóńil bólýdi jáne salalyq memlekettik baǵdarlama qabyldaýdy tapsyrǵan bolatyn. Osy rette memlekettik baǵdarlama jobasyna Alakól jaǵalaýy, Ile Alataýynyń taý klasteri, Sharyn shatqaly sııaqty oblystyń iri týrıstik rekreasııalyq aýmaqtaryn damytý baǵytyndaǵy usynystar engizilip, josparlary ázirlenip jatyr, – dedi forýmda sóz alǵan oblys ákiminiń birinshi orynbasary Lazzat Turlashov.
Sondaı-aq halyqaralyq sharaǵa arnaıy kelgen Qytaı Halyq Respýblıkasy Mádenıet jáne týrızm mınıstrliginiń Ortalyq Azııadaǵy ókili Van Shýlın Jetisý óńiriniń týrıstik tartymdylyǵy álemniń nazaryn aýdaryp otyrǵanyn, óz jerlesteriniń de jyl saıyn munda kelip demalýǵa yntaly ekenin aıtsa, Qazaqstan Týrıstik qaýymdastyǵynyń atqarýshy dırektory, qazaqstandyq qonaqúıler men meıramhanalar qaýymdastyǵynyń prezıdenti Rashıda Shaıkenova otandyq týrızmniń áleýeti men qyzmet kórsetý salasyndaǵy máselelerdi sóz etti.
– Halyqaralyq týrızm naryǵynda básekege qabiletti bolý úshin biz eń aldymen bul salada baı tarıhymyzdy, mádenıetimiz ben saltymyzdy kórsete bilýimiz kerek, – dedi Rashıda Shaıkenova óz sózinde.
Munan bólek maman salany sıfrlandyrýdyń múmkindikterine toqtaldy. Onyń aıtýynsha, búginde otandyq týrıstik nysandardyń tek 17 paıyzy ǵana óz qyzmetterin jarnamalaý men satý arnasy retinde ınternet pen áleýmettik jelini paıdalanyp otyrǵan kórinedi.
Jalpy, týrıstik áleýetti arttyrý baǵytyndaǵy halyqaralyq sharanyń Taldyqorǵanda ótkizilýi tegin emes. Qazir oblys týrızmniń tabystylyǵy jóninen elimiz boıynsha alǵashqy orynda. Qazirgi ýaqytta Almaty oblysyna keletin týrıster qatary maýsym saıyn kóbeıip keledi, derek boıynsha ol lek jylyna 20-30 paıyzǵa kóbeıý ústinde eken. Mysalǵa, osy jyly Jetisýdyń ásem tabıǵatyn tamashalap, jaǵajaı aýmaǵyndaǵy demalys oryndaryna kelgen týrıster sany 2 mln adamǵa jetken. Al esep boıynsha Almaty oblysyna týrızmniń damýynan túsken qarjy 10 mlrd teńge shamasynda bolmaq.
Qalmahanbet MUQAMETQALI,
«Egemen Qazaqstan»
Almaty oblysy
