Jarystyń ashylý saltanatynda oblys ákiminiń birinshi orynbasary Aıdarbek Saparov sóz sóılep,saıdyń tasyndaı iriktelip kelgen boz kilem myqtylaryna sáttilik tiledi. Joldaý talaptaryna oraı óńirde atqarylyp jatqan buqaralyq sportty damytý sharalaryna toqtaldy.
Qazaq kúresi federasııasynyń bas hatshysy Baqdáýlet Sábıtov Aıdarbek Saparovqa, dene shynyqtyrý jáne sport basqarmasynyń basshysy Rýslan Esenalınge qazaq kúresi federasııasynyń prezıdenti, «Qazaqstan barysy» týrnıriniń uıymdastyrýshysy Arman Shoraevtyń Alǵys hatyn tabystady. Al qazaq kúresinen oblystyń tuńǵysh sport sheberi, Petropavl qalasynyń qurmetti azamaty Baýyrjan Quljanov ulttyq sportty damytýǵa qosqan úlesi úshin federasııanyń tósbelgisimen marapattaldy.
Birneshe kúnge sozylǵan birinshilik barasynda 90 kılo salmaqta shymkenttik balýan Ádiljan Ystybaev jeńimpaz atandy. 100 kılo salmaq dárejesinde beldesken balýandardyń arasynda Qyzylorda oblysynyń ókili Nurym Sálimgereev top jardy. Absolıýtti salmaqta Almaty qalasynyń ókili Rýslan Ábdirazaqov qarsylas shydatpady.
Saıystyń jeńimpazdary men júldegerleri el quramasyna qabyldanyp, 2019 jyly ótetin álem chempıonatynda jáne «Eýrazııa barysy» týrnırinde baqtaryn synaıtyn bolady.
О́mir ESQALI,
«Egemen Qazaqstan»
Soltústik Qazaqstan oblysy
