Keńeıtilgen otyrystyń basty taqyryby – 2017-2020 jyldarǵa arnalǵan jastardy qoldaý jónindegi Jol kartasynyń oryndalý máseleleri boldy. Jastardy jumyspen qamtý, volonterlik qozǵalysty, digital bastamalardy damytý, jastar arasynda otansúıgishtik pen salaýatty ómir saltyn nasıhattaý sekildi san-salaly taqyrypty qamtyǵan keńes otyrysyna qatysýshylar óte belsendilik tanytty. Olardyń bári de «Jastardiki» dep úki taǵylǵan aldaǵy jyldan erekshe úmit kútedi.
Batys Qazaqstan oblysynyń ákimi Altaı Kólginov ózi júrgizip, barlyq aýdan, salalyq basqarma basshylary túgel qatysqan jıynda tıisti sala jetekshileriniń osy kezge deıin atqarǵan jumystarynyń baıandamasy tyńdaldy. Jyl basynan qarasha aıynyń basyna deıin óńirde memlekettik baǵdarlamalar aıasynda 10 myńnan astam jas jumyspen qamtylǵan eken. Buǵan qosa oblystyń medısına, pedagogıka, aýyl sharýashylyǵy salalaryna qajetti mamandardy daıyndaý úshin jergilikti bıýdjetten 100 bilim granty bólingen. Qazirdiń ózinde Aq Jaıyq óńirinde jastarǵa arnalǵan 8 kovorkıng ortalyǵy ashylǵan, onyń altaýy – aýdan-aýyldarda qyzmet etip tur. «Qoljetimdi sport» baǵdarlamasy aıasynda 50-den asa sport nysandary paıdalanýǵa berilgen.
Batys Qazaqstan oblystyq jastar saıasaty máseleleri basqarmasynyń basshysy Aıan Saqoshevtyń aıtýynsha, Aq Jaıyq óńirinde 136 myńnan astam jas bar. Onyń 3,1 paıyzy esh jerde jumys istemeıdi. Biraq bul elimiz boıynsha jaqsy kórsetkish. Jastar arasyndaǵy jumyssyzdyq sońǵy úsh jylda eki esege deıin azaıǵan. О́ńirde «Batys Qazaqstan oblysy jastaryn damytýdyń 2017-2020 jyldarǵa arnalǵan jol kartasy» júzege asyrylýda. Jol kartasy jastardy jumyspen, sapaly ári qoljetimdi bilimmen qamtý, jastardyń bos ýaqyttaryn tıimdi uıymdastyrý, jeke jáne kásibı turǵydan ósýge jaǵdaı jasaý syndy 4 negizgi baǵyttan turady.
Aıan Saqoshev óz sózinde Oral qalasynda, Bókeı ordasy, Jańaqala, Zelenov aýdandarynda jergilikti atqarýshy bılik jastardyń bos ýaqytyn tıimdi uıymdastyrý máselesine jetkilikti kóńil bólmeı otyrǵanyn aıtty. Jastar arasynda júrgizilgen saýalnama nátıjeleri osyny kórsetken. Bul rette Qaztalov aýdany ózgelerge úlgi etýge turarlyq: munda jyl basynan beri jastarǵa arnalǵan jumys jármeńkesi 5 márte uıymdastyrylyp, 250 jas jumys tapqan. Qaztalov aýdanynyń ákimi Abat Shynybekov «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda sońǵy eki jyl ishinde aýdan jastary 91 mln. teńge nesıe alyp, óz isin bastaǵanyn, 20 jumys ornyn ashqanyn jetkizdi. Osy ýaqyt ishinde aýdanǵa «Dıplommen aýylǵa» baǵdarlamasy boıynsha 150 jas maman kelipti. Onyń 90-y – muǵalimder, 47-si – medısına qyzmetkeri.
Jalpy, jastar arasynda kásipkerlikti qoldaý máselesi óńirde jaqsy jolǵa qoıylǵan. «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda oblysta 8,5 myńdaı jas jumyspen qamtý sharalaryna tartylǵan. Onyń 6,3 myńǵa jýyǵy jumysqa ornalastyrylǵan. «Bıylǵy toǵyz aıda «Bastaý Bıznes» jobasy boıynsha kásipkerlik negizderine oqýǵa 507 jas joldanyp, 100 adam nesıe alsa, 10-yna memlekettik grant buıyrdy» - deıdi Batys Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Altaı Qulqaev.
Jıynda jastar ókilderi de óte belsendi bolyp, óz oılary men usynystaryn ashyq bildirip otyrdy. Jýrnalıst, Batys Qazaqstan oblysy ákimdigi janyndaǵy jastar isteri jónindegi keńes múshesi Galına Manseva, ınjener Aqjol Jandaýov, qaztalovtyq jas kásipker Indıra Álibekova, jastar bı tobynyń jetekshisi Asan Samatov, stýdent Áıgerim Luqpanova, «Zenıt» zaýyty jastar komıtetiniń tóraǵasy Serik Dáýletııarov jáne basqalary jastar ómiriniń ár salasyna baılanysty óz kózqarasy men pikirin bildirdi. Bul pikirlerdiń qaı-qaısysy da óńir basshysynyń qoldaýyna ıe boldy. Máselen, jastardyń buqaralyq sportpen aınalysýyna sońǵy kezderi Oral qalasynda óte qolaıly jaǵdaı jasalyp jatqany rızashylyqpen aıtylsa, Altaı Kólginov taıaý bolashaqta Shaǵan ózenin boılap velojolaqtar men jaıaý júrginshilerge arnalǵan seıil alańdary salynatynyn habarlady. Oblys basshysy sondaı-aq Oral qalasynyń tabıǵı jaǵdaıy trıatlon sportyn damytýǵa óte qolaıly ekenin aıtady.
– 2019 jyldyń Jastar jyly dep jarııalanýy jastar saıasatyna úlken serpin bererine senim mol. Biz qazirgi tańda oblysymyzdaǵy jastarǵa qatysty máseleniń barlyǵyn zerttep, zerdelep, birqataryn iske asyrýdamyz. Elimizdiń, sonyń ishinde óńirimizdiń jas azamattaryn tolǵandyratyn naqty máselelerdi sheshýmen aınalysýymyz qajet. Búgingi jıynda jastar oryndy usynystar aıtty. Biz olardyń bárin óz josparymyzǵa engizemiz. Jyl sońyna deıin biz jastardyń oblystyq forýmyn uıymdastyramyz. Ol jıynda jastar óz oı-pikirin ashyq aıtyp, keńinen talqylaýy tıis. Al kelesi jyly Oral qalasynda shekaralyq óńirdegi, sonyń ishinde kórshi memleket jastary da bas qosady. Jastardyń bir birimen tanysyp, tájirıbe almasyp, bolashaq damýy úshin mundaı basqosýlar óte qajet, - dedi óńir basshysy Altaı Kólginov.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretti túsirgen Temirbolat TOQMÁMBETOV
