Sh.Aımanov atyndaǵy «Qazaqfılm» kınostýdııasy Qazaqstannyń Rýmynııadaǵy elshiligi men Klýj-Napoka qalasynyń qurmetti konsýldyǵymen birlesip uıymdastyrǵan festıvalde sońǵy jyldary óner keńistigine aıtýly jańalyǵymen engen otandyq úzdik týyndylar kórsetildi. Atap aıtar bolsaq, Sh.Aımanov atyndaǵy «Qazaqfılm» kınostýdııasynda jaryq kórgen «Jaýjúrek myń bala», «Anaǵa aparar jol», «Qunanbaı», «Oralman» jáne «Jańǵaq tal» fılmderi rýmyn kórermenderiniń kózaıymyna aınaldy.
Festıvaldiń ashylý saltanatynda Qazaqstannyń Rýmynııadaǵy elshisi Dáýlet Batyrashev rýmyn aýdıtorııasyn otandyq kınoóndiris ónimderimen tanystyrý sharasy memleketterdiń mádenı-gýmanıtarlyq yntymaqtastyǵynyń damýyna jáne eki eldiń rýhanı jaqyndasýyna yqpalyn tıgizetinin aıryqsha atap ótse, akter Asylhan Tólepov kórermenderge «Jaýjúrek myń bala» fılminiń túsirilýi týraly aıtyp berdi.
Aıtýly óner oqıǵasyna jergilikti turǵyndar men qoǵam qaıratkerleri, úkimet, iskerlik jáne akademııalyq orta ókilderi, sondaı-aq Klýj-Napoka qalasynda oqyp júrgen qazaqstandyq stýdentter qatysty. Olar qazaq kınofestıvali qalanyń mádenı ómirinde erekshe qubylys bolǵanyn, bul sharanyń Rýmynııa Birliginiń júzjyldyq mereıtoıy qarsańynda ótip jatqanyn aıtyp, kórsetilim sońynda óz áserlerimen bólisti.
Otandyq fılmderden shabyt alǵan rýmyn kórermenderi men kıno mamandary rejısserler jumysyna joǵary baǵa berip, qazaqstandyq kıno mektebiniń erekshelikterine jan-jaqty toqtaldy.
Aıgúl AHANBAIQYZY,
«Egemen Qazaqstan»
ALMATY
