Burynǵy bir ortalyqqa baǵynǵan memlekettik baspalar men polıgrafııalyq kásiporyndar jekeshelendirildi, básekelestik ortaǵa berildi. Sóıtip, naryqtyq ekonomıkaǵa bet burǵan tusta kitap pen baspa salasy qıyn jaǵdaılarǵa tap keldi. Kitap shyǵarý kúrt kemidi.
Sońǵy ýaqyttarda Internet jyldam damyp kele jatqanyna qaramastan, jer betindegi adamdardyń kóp bóligi, áli de bolsa, sıqyrly qobdıshadaǵy kınodan bas tartar emes. Oǵan dálel elimizdegi jyl sanap kınoteatrlar sanynyń artýy. Kıno túsirý salasyna jumsalatyn ınvestısııalar kólemi de jyl saıyn artyp keledi. Ulttyq kınematografııa Eýropa, Azııa jáne Amerıkadaǵy óner ortalyqtarynan seriktesterdi kóptep taba bastady. Eldegi kıno naryǵynyń aýqymy tar jáne jergilikti kınostýdııalar túsirgen fılmderdi jurtqa kórsetýden túsetin paıda jalpy kassalyq túsimniń on paıyzyna da jetpeıdi. Al reseılik dıstrıbıýtorlar Qazaqstanǵa eksporttap otyrǵan Gollıvýd stýdııalarynyń fılmderinen túsetin paıda kassalyq túsimniń shamamen jetpis paıyzyn quraıdy.
Osyǵan baılanysty, memleket tarapynan kitap shyǵarý jáne kınoóndirisi qyzmetterine qatysy bar salalardy damytý máselelerine erekshe nazar aýdarý qajet, bul úlken qarjylyq jáne shyǵarmashylyq resýrstardy talap etedi. Osy salalardy damytý arqyly, otandyq kitap jáne kıno ónimmen toltyrýǵa múmkindik týady.
Qazirgi ýaqytta elimizde qyzmettiń basym túrlerin júzege asyrý úshin 11 arnaıy ekonomıkalyq aımaq jumys isteıdi. Aımaqtar qazirgi zamanǵy ónimdiligi joǵary, básekege qabiletti óndiristerdi jedel damytý, ekonomıka salalaryna jáne óńirlerge ınvestısııalar, jańa tehnologııalar tartý, sondaı-aq halyqty jumyspen qamtýdy arttyrý maqsatynda qurylǵan. Aımaq qatysýshylary úshin Salyq kodeksinde jáne «Qazaqstan Respýblıkasyndaǵy arnaıy ekonomıkalyq aımaqtar týraly» zańda korporatıvtik tabys salyǵyna, jer salyǵyna, múlik salyǵyna, qosylǵan qun salyǵyna qatysty jeńildikter kózdelgen.
Biz osy máselelerdi eskere otyryp, Úkimetten kitap óndirisi men baspa isi, kınoóndiris salalary boıynsha otandyq kompanııalardyń aımaq rejiminde jumys isteý múmkindigin qarastyrýdy jáne osy máseleni normatıvtik quqyqtyq retteý jóninde tıisti sharalar qabyldaýdy surap otyrmyz.
Birǵanym ÁITIMOVA,
Senat depýtat
