Biz múgedektermen kezdeskende de, olardyń bizge jazǵan hattarynda da kórsetiletin qyzmetterdiń sapasy nashar ekendigi aıtylady. Máselen, birinshi toptaǵy kózi kórmeıtin múgedekterge baǵasy 800 myń teńgege jýyq baǵdarlamaly noýtbýkter áperiledi eken, biraq olardyń sapasy nashar, jumys isteý múmkindigi óte tómen. Al sol somaǵa Apple kompanııasynyń nemese osydan eki ese tómen baǵaǵa basqa da bir sapaly fırmanyń kompıýterlerin alýǵa bolady. Biraq osy másele qolǵa alynbaı otyr. Osyndaı olqylyqty yńǵaısyz mehanıkalyq múgedekter arbalaryna da qatysty aıtýǵa bolady.
Bir jerden kóterme saýda arqyly arzan baǵaǵa alynǵan osyndaı zattardy jetkizýshilerdiń memleketke qymbat baǵaǵa satyp otyrǵany kórinip tur. Sybaılas jemqorlyqtyń belgileri baıqalatyn osyndaı istermen arnaýly organdar aınalysýy kerek-aq.
Múgedekterge qatysty mundaı mysaldar óte kóp. Kóp jyldan beri aıtylyp kele jatqan sapaly protez týraly áńgimeler áli kúnge sol qalpynda qalyp otyr. Onyń ornyna bálen jylǵy aǵash protezder men sartyldaǵan baldaqtar qoldanylyp júrgenin kórgende qaraýǵa uıalasyń.
Biz Premer-Mınıstrdiń orynbasary Erbolat Dosaevqa depýtattyq saýal joldap, Prezıdenttiń Joldaýyndaǵy talaptarǵa sáıkes qarajatty adamnyń turmys sapasyn arttyrýǵa jumsaýǵa shaqyrdyq. Sonyń ishinde múgedekterge qajetti quraldardy, atap aıtqanda kózi kórmeıtinder úshin arnaýly qondyrǵy ornatylǵan kompıýterlerdi, múgedekterdiń elektrli arbalaryn, osy zamanǵy protezder satyp alýdy barynsha ashyq, móldirlikpen júrgizýdi talap ettik. Sonda áldekimder memleket qarajattaryn túrli qıturqylyqtarmen qaltalaryna baspas edi.
Irına SMIRNOVA,
Májilis depýtaty
