Kórmege koreı halqynyń «Hahve Bıolsıngýt Talnorı», «Bonsan Talchým», «Sýıon Iаrý» jáne basqa da teatrlandyrylǵan dástúrli bı qoıylymdarynda qoldanylatyn maskalar qoıyldy.
«Bul kórme – eki el arasyndaǵy mádenı-dostyq tyǵyz qarym-qatynastyń aıqyn kórinisi. Maskalar sherýi arqyly koreı eliniń mádenıetimen, ózindik erekshelikterimen jaqynyraq tanysýǵa bolady. Búgingi kórmeniń taqyryby da erekshe. Koreı halqynyń tamyry tereń tarıhynan syr shertedi. Aıtýly shara kópshilik kóńilinen shyǵyp, kelýshiler tarapynan oń baǵasyn alaryna senemin. Aldaǵy ýaqytta da tyń bastamalardy birlese júzege asyryp, jańa shyǵarmashylyq jobalarǵa jol ashamyz degen nıettemiz», dedi kórmeniń ashylý saltanatynda sóz alǵan Ulttyq mýzeı dırektorynyń orynbasary Abaı Satybaldın.
Maska mádenıeti barlyq halyqta bar. О́ner áleminiń osynaý aıryqsha túrin jer sharynyń túkpir-túkpirine kezdestirýge bolady. Alaıda olar ár elde ózindik erekshelikke ıe. Baı tarıhy sonaý ejelgi Grekııa men Italııa jerinen bastaý alyp, keıin áıgili «del arte» komedııalyq teatrynyń qalyptasýyna negiz bolyp, ataǵy kúlli álemge jaıylǵan óner týyndysynyń ár halyqtyń mádenıeti men ómir súrý qalybynan, dástúr men dilinen alar orny aıryqsha. Sonyń ishinde, ásirese koreıler ómirindegi máni men mańyzy zor. Kelbeti úreı týdyratyn qudaılar men janýarlar beınelengen ózge elderdiń maskalarymen salystyrǵanda, koreı maskalary adam kelbeti men minez-qulqyn, kóńil kúı sezimderin shynaıy beıneleıdi.
«Kórmede sizder koreı halqynyń dástúrli maska mádenıeti jáne ony daıyndaý ádisterimen tanysa alasyzdar. Bul maskalar adamdar arasyndaǵy ózara jyly qarym-qatynas, nıettestikti nyǵaıtyp, bir-birin kúldirip, qýantý úshin jasalady. Maskalarda janýarlar, ózge de tirshilik ıeleri emes, tek qana adam beınesindegi kúlkili beıneler sýrettelgen», dep Qazaqstandaǵy Koreıa Respýblıkasynyń Tótenshe jáne ókiletti elshisi Kım de Sık kórmeniń ózindik ereksheligine toqtalyp, koreı halqynyń mádenıetimen tanystyryp ótti.
Aıtýly kórmege koreı dástúrli maskalarynyń 61 túri usynylyp otyr. Osy arqyly Choson dınastııasy kezeńindegi Koreıa halqynyń ómir súrý daǵdysy men mádenıetine tereńnen boılap, jan-jaqty maǵlumat alýǵa bolady. Kórme 2018 jyldyń 23 jeltoqsanyna deıin jalǵasady.
Nazerke JUMABAI,
«Egemen Qazaqstan»
