Jıynǵa oblystyq, qalalyq máslıhat depýtattary, jumyspen qamtýdy úılestirý jáne áleýmettik baǵdarlamalar basqarma basshylary qatysty.
Qumar Irgebaıuly óz sózinde «Ońtústikten– soltústikke» memlekettik baǵdarlamasy júıeli túrde júzege asyrylyp jatqanyn, búginge deıin elimizdiń ár qıyrynan 2700 adam qonys aýdarǵanyn, olardyń jartysyna jýyǵy Túrkistan oblysynan at basyn tiregenin atap ótti. Soltústik óńirlerge óz erkimen barǵysy keletin otbasylarǵa memleket aıtarlyqtaı qoldaý kórsetedi. Jergilikti bılik tarapynan da barynsha jaǵdaı jasalady.
«Jumyspen qamtý - 2020» baǵdarlamasy sheńberinde ońtústikten soltústikke qonys aýdarǵan turǵyndardyń qatary az emes. Máselen, 2016 jyly Maǵjan eline 167, ótken jyly 745 otbasy qonys aýdarǵan. Bıyl 10 aıdyń ishinde 1706 kvota bólinip 1440 adam kóship kelse, úshten biri eńbekke jaramdy. 376 adam jumyspen qamtylǵan. Desek te, aýyl sharýashylyǵy mamandary men bıýjettik qyzmetkerler áli jetispeıdi.
Shymkent qalasynyń ákimi Ǵabıdýlla Ábdirahymov birge jumys isteýge yqylasty ekenin, aldaǵy ýaqytta soltústikke kóshken otbasylardyń hal-jaǵdaıyn kórip kelýge baratynyn jetkizdi.
Sóz arasynda mektep bitirýshi túlekter «Serpin» baǵdarlamasy boıynsha tegin oqyp, jumysqa ornalasa alatynyn, úsh jyl qyzmet etken, balaly bolǵan jas otaý ıelerine baspana beriletinin aıta ketken jón.
О́mir ESQALI,
«Egemen Qazaqstan»
Soltústik Qazaqstan oblysy
