Mansap ortalyqtaryn uıymdastyrý jobasy QR Prezıdenti janyndaǵy Sheteldik ınvestorlar keńesiniń eńbek zańnamasy, adam kapıtalyn damytý jáne sheteldik jumys kúshin jumyldyrý jónindegi birlesken jumys toby jospary aıasynda júzege asýda. Qazirgi kezde aımaqtyq joǵary oqý oryndaryndaǵy mansap ortalyqtaryn uıymdastyrýǵa baǵyttalǵan eń úzdik tájirıbelerdi qoldanysqa engizý boıynsha jumystar júrgizilýde. Jobanyń maqsaty aımaqtyq joǵary oqý oryndary túlekteriniń eńbek naryǵyndaǵy básekelestigin arttyrý bolyp tabylady.
Joba aıasynda jetekshi joǵary oqý orny – KIMEP negizinde ótken trenıng-semınarda mansap ortalyqtarynyń jumys isteýin qamtamasyz etýdegi máseleler talqylandy. Semınarǵa S. Amanjolov atyndaǵy Shyǵys Qazaqstan memlekettik ýnıversıteti, M. Áýezov atyndaǵy Ońtústik Qazaqstan memlekettik ýnıversıteti, Sh. Ýálıhanov atyndaǵy Qaraǵandy memlekettik tehnıkalyq ýnıversıteti, E. Bóketov atyndaǵy Aqtóbe aımaqtyq memlekettik ýnıversıteti, S. Toraıǵyrov atyndaǵy Pavlodar memlekettik ýnıversıtetiniń ókilderi qatysty.
KIMEP Oqý isi jónindegi prorektory doktor Gılbert Lınne stýdentterdi naryq jaǵdaıynda jumysqa ornalastyrýda mansap ortalyqtarynyń jaýapkershiligi joǵary ekendigine toqtaldy. Al jahandyq deńgeıde oılaı biletin, zamanýı álemdik suranystarǵa daıyn maman bolyp shyǵý stýdenttiń ózindik izdenisi men talabyna baılanysty.
KIMEP ýnıversıtetiniń Mansap jáne jumyspen qamtý qyzmetiniń jetekshisi Merýert Adaıbekovanyń aıtýynsha, joǵary oqý oryndary óz stýdentterine eńbek naryǵynda qajetti mamandyqtardy ıgerýge múmkindik beretin bolsa, mansap ortalyqtary oqý orny men jumys berýshi arasyndaǵy basty dáneker bolyp tabylady. Osy oraıda jıyrma jyldan astam tájirıbesi bar KIMEP mansap ortalyǵy stýdenttermen tyǵyz baılanysta jumys istep keledi. Statıstıkalyq málimetter boıynsha, stýdentterdiń 45 paıyzdan astamy oqı júrip jumysqa ornalassa, 40 paıyzǵa jýyǵy oqý bitirgennen keıin, al ózgeleri 3-6 aı aralyǵynda jumysqa ornalasqan.
«Fılıp Morrıs Qazaqstan» JShS uıymdyq damý jónindegi menedjeri Tatıana Kovzalova atalǵan kompanııada stýdentterge aqy tólenetin taǵylymdama baǵdarlamalary qarastyrylǵandyǵyn jetkizdi. Mundaı sharalar stýdentterge ózderin naqty jobalarda synap, áleýetin tanytýǵa múmkindik beredi. Jumys berýshiler men joǵary oqý oryndarynyń mansap ortalyqtary arqyly tyǵyz baılanysta bolýy elimizdiń barlyq aımaqtarynda qoldanysqa enýi tıis.
Semınar barysynda mansap qyzmetine jalpy sholý jasalyp, stýdentter jáne túlektermen júrgiziletin jumys, seriktes kompanııalarmen yntymaqtastyq ornatý, stýdentterdiń qabiletterin damytýdy kózdeıtin trenıngter, semınarlar, bıznes-oıyndardy uıymdastyrý, bos oryndar jármeńkesi sııaqty mańyzdy máseleler talqylandy.
Elvıra SERIKQYZY,
«Egemen Qazaqstan»
ALMATY
