Týrnır qorytyndysy boıynsha, komandalyq esepte birinshi oryndy 2 altyn, 3 kúmis jáne 2 qola medalmen Túrkistan oblysy, ekinshi oryndy bir altyn, úsh kúmis jáne tórt qola medalmen Mańǵystaý oblysy, al úshinshi oryndy Jambyl oblysy 1 altyn, 2 kúmis jáne úsh qola medalmen qorytyndylady.
Aıtýly sharaǵa elimizdiń 14 oblysy men 3 respýblıkalyq mańyzy bar qaladan barlyǵy 206 sportshy qatysty. Qatysýshylardyń qatarynda álemdik arenalarda top jaryp júrgen Qaırat Eralıev, Vasılıı Levıt, Ábilhan Amanqul, Aslanbek Shymbergenov, Bekdáýlet Ibragımov, Abylaıhan Júsipov, Temirtas Júsipov, Ilıas Súleımenov, Erik Áljanov, aǵaıyndy Tóltaevtar bar. Júzden júırik shyqqandar keler jyly ótetin Azııa jáne Álem chempıonattarynda baq synaıtyn bolady.
Qazaqstan Boks Federasııasy jáne Mańǵystaý oblysy ákimdiginiń qoldaýymen ótken jarysqa Ermahan Ybraıymov, Baqtııar Artaev, Bolat Jumadilov, Baýyrjan Ospanov, Myrzaǵalı Aıtjanov, Marat Mázimbaev, Mereı Aqshalov, Birjan Jaqyp, Nurjan Kárimjanov qurmetti qonaq retinde qatysty.
Sonymen qatar, saltanatty sharada eki birdeı Olımpıada oıyndary men Álem chempıonattarynyń eki dúrkin kúmis júldegeri, Azııa oıyndarynyń chempıony, Ádilbek Nııazymbetov úlken sporttaǵy karerasyn aıaqtaǵanyn málimdedi.
Kópshilik aldynda boksshymyzǵa qurmet kórsetilip, halyq zor qoshemetpen shyǵaryp saldy. Sondaı-aq, halyqaralyq dárejedegi sport sheberi, bokstan Azııa chempıony, Álem chempıonatynyń qola júldegeri, birneshe dúrkin el chempıony, Berik Abdrahmanov ta bylǵary qolǵabyn shegege ilip, sharshy alańdaǵy ornyn keıingi jastarǵa amanattady. Aldaǵy jospary shákirt tárbıelep, Mańǵystaý boks mektebiniń damýyna óz úlesimdi qossam deıdi ol.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
