«Aqtóbe» fýtbol klýbynyń elektrondy saýdasy úsh ret ótkizilgen. 2018 jyly 20 qarashada ótken saýda-sattyqtyń nátıjesi boıynsha Smaqov Samat Kabıruly jeńimpaz atandy. Aıta ketý kerek, ol úshinshi saýda-sattyqtyń jalǵyz qatysýshysy bolatyn.
Klýb senimdi basqarmaǵa keıin satyp alý quqyǵymen jeti jylǵa berildi. Kelisim 108 mln teńgeni qurady.
Kelisimniń sharty klýb qyzmetiniń profıli men áreket etýshi qyzmetkerler quramynyń kem degende 75 paıyzyn saqtaý bolyp tabylady jáne kepilge berýge, sonyń ishinde jyljymaly jáne jyljymaıtyn múlikke qatysty basqa da áreketterge tyıym salynady.
Budan basqa, jańa qojaıyn klýbtyń Premer-Lıganyń klýbtarǵa qoıatyn tártipterine sáıkes barlyq mindetti týrnırler men jarystarǵa qatysýyn qamtamasyz etýimen qatar, balalar fýtbolyn, sonyń ishinde oblys aýdandarynda da atalǵan sport túrin damytýy kerek.
Jekeshelendirý menedjement sapasy men klýbty basqarý tıimdiligin kóterýge, bıýdjetke túsetin salmaqty tómendetýge, jeke ınvestısııalardy tartýǵa, sonymen qatar, óńirdegi fýtbol ınfraqurylymyn jaqsartýǵa múmkindik beredi dep kútilip otyr.
Temir Qusaıyn,
«Egemen Qazaqstan»
